Легендарниот дрес на Пеле од финалето на Светското првенство во 1958 година ќе биде понуден на аукција. Тоа е дресот што тогаш 17-годишниот Пеле го носеше додека ги постигнуваше историските голови против Шведска и ја започнуваше својата величествена фудбалска приказна.
Дресот на еден од најдобрите фудбалери во историјата, Бразилецот Пеле, кој го носеше во финалето на Светското првенство во 1958 година, ќе биде изложен на аукција во „Sotheby’s“ од 29 јуни до 16 јули.
Се проценува дека дресот би можел да достигне цена поголема од шест милиони долари.
Пеле го носеше синиот дрес со кратки ракави за време на победата на Бразил од 5:2 во финалето против домаќинот Шведска на стадионот Расунда, во близина на Стокхолм. Тогаш 17-годишниот Пеле постигна два гола во финалниот натпревар.
„Ова не е само дрес, туку облека што ја носел еден од најголемите фудбалери во историјата во ноќта кога започна неговото владеење – изјави Брам Вахтер, раководител на одделот за модерни колекционерски предмети во „Sotheby’s“.
По финалето, Пеле му го подарил дресот на својот цимер и соиграч Диди. По децении поминати во семејството на Диди, дресот бил изложен во музеј, пред во 2004 година да биде преземен од анонимен сопственик.
Постои можност дресот на Пеле да достигне и рекордна цена. Во моментов рекордот го држи дресот на Диего Марадона, кој го носеше на натпреварот против Англија на Светското првенство во 1986 година, кога го постигна легендарниот гол со „Божјата рака“.
Тој дрес беше продаден за 9,28 милиони долари пред четири години.
