Првите неколку часа по будењето често го одредуваат нивото на енергија, апетитот и изборот на храна во текот на остатокот од денот, па токму утринските рутини можат да бидат важен сојузник во процесот на слабеење.

Според порталот „EatingWell“, постојат четири едноставни навики кои можат позитивно да влијаат врз метаболизмот, чувството на глад и контролата на внесот на храна.

Експертите денес сè помалку зборуваат за драстични диети, а сè повеќе за секојдневни рутини и животни навики. Токму малите, но доследни промени често даваат подолгорочни резултати отколку строгите ограничувања.

Нутриционистката Мелиса Митри објаснува дека здравите утрински навики создаваат ефект на домино – една добра одлука ја поттикнува следната, па така целиот ден може да тргне по поздрав пат.

Квалитетниот сон е основа

Еден од најважните фактори за регулирање на телесната тежина е доволно сон.

Стручњаците препорачуваат меѓу седум и девет часа квалитетен одмор, бидејќи недостатокот на сон може да го зголеми апетитот и желбата за калорична храна.

Нутриционистката Менди Енрајт истакнува дека заморот често води кон полош избор на храна, особено зголемена желба за слатки и брза храна.

Чаша вода веднаш по будењето

Многу едноставна навика, како пиење вода наутро, може да има позитивен ефект врз организмот.

Мелиса Митри советува водата да се испие во првите половина час по станувањето, бидејќи помага во хидратацијата, го поттикнува варењето и може да го намали чувството на лажен глад.

Нутриционистката Бони Тауб-Дикс наведува дека редовниот внес на вода може да помогне во одржувањето на здрава телесна тежина, бидејќи го зголемува чувството на ситост и ја намалува потребата за прејадување.

Појадок богат со протеини

Протеинскиот појадок може да помогне подолго да останете сити и да ја намалите желбата за грицки во текот на денот.

Протеините влијаат врз хормоните на гладот и придонесуваат за зачувување на мускулната маса, која е важна за потрошувачката на енергија.

Меѓу најдобрите избори за утрински оброк се издвојуваат:

• јајца

• грчки јогурт

• младо сирење

• кефир

• јаткасти плодови

• мешунки

Стручњаците препорачуваат и едноставни смути напитоци со јагодесто овошје, грчки јогурт и спанаќ како брз и хранлив појадок.

Утринска физичка активност

Вежбањето наутро може дополнително да го поттикне согорувањето масти и да ја подобри контролата на апетитот.

Истражувањата покажуваат дека луѓето кои редовно вежбаат наутро често имаат понизок индекс на телесна маса и помал обем на половината, пренесува „B92“.

Слабеењето ретко се темели на еден голем потег.

Многу почесто резултатите доаѓаат преку мали навики што секојдневно се повторуваат.

Токму затоа квалитетниот сон, хидратацијата, добриот појадок и утринското движење можат да станат важна основа за поздрав живот и постабилна телесна тежина.