[ФОТО/ВИДЕО] Костим кој ја дефинира наследничката: Што открива стилот на Ким Џу - ае за Северна Кореја и нејзината идна улога?

Додека чекорела покрај својот татко пред висок интерконтинентален балистички проектил, таа носела црни панталони и бела јакна со шевов, а долгата коса ѝ била врзана одзади, пишува „BBC“.

Кога првпат се појавила во државната пропаганда – имала, како што се наведува, само девет години – Џу Ае веќе била облечена така што да остави впечаток.

Од тогаш нејзините фризури стануваат сè покомплексни, а облеката сè поелегантна и пософистицирана.

Јужнокорејската разузнавачка служба верува дека Ким Џонг Ун ја избрал за наследничка, со оглед на тоа колку брзо добила на значење на толку млада возраст.

Џу Ае, за која се верува дека сега има 13 години, сè почесто се фотографира со својот татко, стоејќи покрај него на лансирања на ракети и воени паради, па дури го придружува и на патувања во странство.

Меѓутоа, некои аналитичари сметаат дека и нејзиниот стил на облекување – кожа, крзно и фризура – укажува на тоа дека се подготвува за водење на државата.

Облеката на Ким Џу Ае веројатно ја одредува Владината служба за пропаганда и агитација.

Понекогаш е видена во формални костими и здолништа, слични на оние што ги носи нејзината мајка Ри Сол Џу.

„Бидејќи Џу Ае сè уште е многу млада, нејзината возраст би можела да се смета како потенцијална слабост за иден лидер. Се чини дека режимот ја облекува во формална облека слична на онаа на нејзината мајка за да ја прикрие нејзината младост и да создаде позрел имиџ“, изјавил заменик-директорот на Институтот Сеџонг, Чонг Сеонг-чанг, за Би Би Си Кореја.

Во други прилики носела кожни јакни, „облека што остава силен впечаток, но истовремено е и лежерна“, погодна за посети на „релативно сурови или нерамни места“ како што се воени бази, навел Чонг.

Тоа, меѓутоа, довело и до тоа таа понекогаш да се облекува исто како својот татко, кој често носи црни кожни јакни и мантили.

Имитацијата на модата од претходните генерации, позната како „репликација на имиџот“, е тактика што севернокорејските лидери ја користат за да ја задржат власта.

Во раните години од своето владеење, Ким Џонг Ун се обидувал да ја зацврсти својата легитимност облекувајќи се слично на својот дедо Ким Ил Сунг.

„Се вели дека жителите на Северна Кореја биле изненадени кога Ким Џонг Ун првпат се појавил. Но причината зошто биле изненадени, според јужнокорејските експерти, е тоа што неговиот прв изглед многу потсетувал на младиот Ким Ил Сунг.“

Со тоа, се додава, се ублажувала фактот дека и тој, тогаш многу млад, немал доволно искуство.

„Дошло дотаму што меѓу Севернокорејците кружеле гласини дека Ким Ил Сунг е реинкарниран“, додал Чонг.

Во 2020 година Северна Кореја го донела Законот за отфрлање на реакционерната идеологија и култура.

Меѓутоа, во 2023 година државната агенција Корејска централна новинска агенција објавила видео на кое Ким Џу Ае повторно шета со својот татко пред интерконтинентална балистичка ракета, овојпат во црна јакна на шевови која подоцна била идентификувана како луксузен модел вреден 1.900 долари од француската модна куќа „Christian Dior“.

Следната година, Ким Џу Ае на церемонија за завршување на изградба на станбен комплекс во главниот град Пјонгјанг носела делумно проѕирна блуза што ги откривала нејзините раце.

Потоа било емитувано видео-предавање како упатство за обичните граѓани, во кое се предупредува дека таквите фризури и парчиња облека не смеат да се носат, бидејќи претставуваат „антисоцијалистички и несоцијалистички појави кои го нарушуваат ликот на социјалистичкиот систем и го поткопуваат режимот – цели што мора да се искоренат“, изјавил локален извор за „Radio Free Asia“.

Овие настани истакнаа како семејството на Ким Џонг Ун – кое во општеството речиси се третира како божествено – често е изземено од правилата што важат за остатокот од населението.

„Иако фармерките се забранети во Северна Кореја како западен моден предмет, Ким Џонг Ун се појавувал во нив. Колку и да забрануваат странска култура и дури носат закони, Северна Кореја е место каде што врховниот лидер може сè“, вели професор Ли Ву-јон од Универзитетот за севернокорејски студии.

Сепак, тоа не ги спречило некои Севернокорејци да сакаат да го следат ова семејство и да се облекуваат софистицирано како Ким Џу Ае.

Постојат извештаи за пораст на луксузна стока како „Chanel“ козметика и парфеми меѓу побогатите Севернокорејци, додека бунди од крзно станале популарни во град близу до границата со Кина.

Фотографии на деца во престижна градинка во делумно проѕирни блузи исто така се појавија во јавноста. Постојат и извештаи дека очилата за сонце и кожните мантили слични на оние што ги носат Ким Џу Ае и Ким Џонг Ун станале популарни меѓу побогатите млади луѓе.

Тоа во Северна Кореја не е невообичаено – претходно веќе имало извештаи за млади мажи кои носеле фризура слична на онаа на Ким Џонг Ун.

Обичните Севернокорејци имаат многу ограничен пристап до информации од надворешниот свет, вклучително и модни трендови, поради што нивниот лидер станал неочекуван моден пример.

Сега се чини дека тоа станала и неговата ќерка.