Она што започнало како обична прошетка до работа се претворило во едно од најзначајните ентомолошки откритија на деценијата.
Гробиштата Ист Лоун во Итака се дом на популација од над пет милиони солитарни пчели, што е трипати повеќе од бројот на жители на Менхетен на површина од само 1,5 хектари, пишува порталот „Физ орг“.
Техничарката во ентомолошката лабораторија на Универзитетот Корнел забележала необична активност на инсекти на гробиштата и донела примерок кај својот шеф, професорот Брајан Данфорт, професор по ентомологија на Колеџот и на Катедрата за земјоделство и биолошки науки.
Идентификацијата потврдила дека се работи за видот „обична рударска пчела“, познат како Андрена регуларис (Andrena regularis).
Ова откритие, објавено во научното списание „Апиодологија“, потврдува дека старите гробишта служат како драгоцени резервати на биодиверзитет. Неколку клучни фактори ги прават идеални живеалишта за пчели што се гнездат во почва:
• Недостаток на пестициди: одржување без агресивни хемикалии;
• Мир и тишина: минимално движење на луѓе и нарушување на почвата;
• Песоклива почва: специфичен состав на земјиштето што го преферираат за копање тунели;
• Економска важност: опрашувачи вредни милиони.
Иако медоносните пчели се најпознати, дивите солитарни пчели играат незаменлива улога во опрашувањето на земјоделски култури со висока вредност.
„Нашето истражување покажува колку овие пчели се бројни и важни како опрашувачи и дека мора да бидеме свесни за овие места за гнездење за да ги зачуваме“, истакнува професорот.
Andrena regularis излегува од земјата рано напролет, токму во време на цветање на јаболка – една од највредните земјоделски култури во државата Њујорк. Војтарниците на Универзитетот Корнел, оддалечени само половина километар, им обезбедуваат изобилен извор на храна, додека гробиштата служат како безбедна база.
Истражувањето, предводено од студент, открило прецизна динамика на ова подземно „општество“.
• Машките единки се појавуваат први во април;
• Чекаат женки за парење при температури околу 21 степен Целзиусов;
• Присутни се и паразитски пчели од родот „Номада“, кои ги користат гнездата на рударските пчели
И покрај нивната бројност, овие подземни „градови“ се многу ранливи. Бидејќи гнездата се плитко под површината, градежни работи или асфалтирање можат да уништат милиони инсекти.
Истражувачкиот тим од Универзитетот Корнел покренал глобален проект во кој граѓаните можат да пријавуваат вакви локации за да се спречи нивно уништување. Гробиштата Ист Лоун, основани во 1878 година, се доказ дека коегзистенцијата меѓу човекот и природата може да трае со векови.
