Реакции на интернет

Панч живее во зоолошката градина Ичикава во Јапонија, каде посетителите и следбениците на интернет го видоа во близок контакт со петгодишната макаки Момо-чан. Снимен е како се брка со неа, се гушка, па дури и „се бакнува“. Неговата кадифена играчка, со која долго време беше нераздвоен, и понатаму се појавува на некои снимки, но се чини дека повеќе не е во центарот на вниманието.

Додека дел од обожавателите нивниот однос брзо го прогласија за љубовна приказна, други беа пореалистични. Како што снимките се ширеа на социјалните мрежи, луѓето реагираа и со хумор и со олеснување.

„Панч најде девојка пред мене“, се пошегува еден корисник на „Reddit“. „Панч сам го одржува менталното здравје на милиони луѓе“, напиша друг. Многумина реагираа многу емотивно и го нарекоа Панч „еден од ретките зраци сонце во овој лош свет“.

Сепак, некои коментатори го отфрлија романтичниот поглед. „Макаките полово созреваат на 3-4 години … Момо-чан има 5 години, а Панч има само 7 месеци, така што ова е повеќе однос на постара сестра и помал брат“, напиша еден корисник, додавајќи дека и негувателите рекле дека таа од почеток му пружала емоционална поддршка.

Без оглед на природата на нивниот однос, интернетот продолжи да ја слави нивната блискост. „Мојот живот сè уште оди во некоја чудна насока, но сакам да го гледам ова мало момче како расте пред нашите очи“, сподели еден следбеник. Друг едноставно додаде: „Панч е вистински цар, има непобедлива аура.“

Патот на Панч до прифаќање

Пред овој пресврт, приказната на Панч беше многу понеизвесна. Откако мајка му го напушти по раѓањето, негувателите му дале кадифена играчка за да го поттикнат природното однесување на прививање кон мајката. На крајот избрал кадифен орангутан со долги раце, кој му станал нераздвоен придружник.

На почетокот делувал повлечено и одвоено од другите макаки, поради што многумина заклучиле дека групата го отфрлила. Но управата на зоолошката градина подоцна појаснила дека не бил малтретиран, туку едноставно му требало време да се адаптира.

Сега се чини дека работите одат на подобро. Покрај тоа што се поврза со Момо-чан, Панч е снимен како седи меѓу возрасни мајмуни, како го чистат, па дури и како се вози на грбот на друг мајмун, што укажува дека сè подобро се вклопува во групата.

Состојба во зоолошката градина

Многумина на интернет се пожалија на условите во јапонската зоолошка градина, кои засега не наликуваат на природно живеалиште на овие животни.

Еден корисник понуди објаснување: „Дури неодамна почнаа да примаат донации. Претходно не добиваа ништо. Влезницата чини само 3 долари за возрасни и 1 долар за деца, па немаше многу средства. Зоолошката градина е и во долгови. Планираат да ги подобрат условите со парите од донациите.“ Зоолошката градина официјално започна и кампања за собирање средства под името „Поддржете го Панч“ со цел да ги подобри условите.