Ако одговорот е „често“, можеби едноставно погрешно ги толкувате податоците на вашиот екран.

„Луѓето понекогаш мислат…“

Метеорологот д-р Роб Томпсон од Универзитетот во Рединг објаснува дека многу луѓе погрешно ги интерпретираат (процентуалните) шанси за врнежи.

„Понекогаш мислат дека ознаката од 30% значи дека дождот ќе падне на 30% од територијата – или дека, ако падне дожд, тој ќе биде слаб и краткотраен. Ни едното ни другото не е точно“, рече тој во разговор за списанието „Which?“.

Тој појаснува дека „30% шанси за дожд“ значи дека постои мала веројатност, три од десет, дека на местото каде што се наоѓате ќе врне дожд, односно седум од десет дека нема да има врнежи, пренесува „Daily Mail“.

„Тие 30% сепак може да значат обилен дожд во текот на целото прогнозирано време или краток, петминутен пороен дожд на крајот на денот“, додаде тој.

Икони пред процентите

Експертите напоменуваат дека многу корисници се фокусираат на симболите за дожд или сонце во апликациите, но процентите се всушност многу поважни.

„Понекогаш е пополезно да се игнорираат иконите што апликациите ги користат за да ја сумираат дневната прогноза. Наместо тоа, погледнете ја вистинската прогноза, вклучувајќи ги дневните и часовните шанси за дожд“, наведува „Which?“.

Некои апликации, вклучувајќи ја „BBC Weather“, користат една икона на облак за дневна прогноза дури и кога шансата за дожд е 50% или помала – што е како „фрлање паричка“.

„Но, дури и ако тој ден не падне дожд, прогнозата е технички точна, затоа што постоела еднаква шанса да не врне“, се наведува.

Споредување на апликации

Уште една честа заблуда е дека прогнозата важи за целата област. Експертите објаснуваат дека временските апликации всушност ја делат земјата на „мрежа од квадрати“, каде секој „квадрат“ покрива површина до 200 километри.

„Ако пороен дожд е прогнозирано некаде внатре во квадратот, иконата за дожд може неточно да се прикаже за вашата локација. Тоа не значи дека кај вас ќе врне дожд“, истакнуваат.

Понатаму, „Which?“ во соработка со Универзитетот во Рединг истражувал која апликација дава најточни прогнози – и лоши вести стигнуваат за фанатиците на „BBC Weather“. Оваа апликација покажала најслаби резултати, често преценувајќи ја количината на врнежи.

Спротивно на тоа, како најточна апликација се покажала „The Weather Channel“, која сигурно го предвидувала времето во наредните часови (т.н. nowcast) и давала прецизни прогнози за остатокот од денот.

Три корисни совети

Ако сте уморни од изненадни порои, Џо Родс од организацијата „Which?“ дава три совети како да добиете најточна прогноза:

• користете повеќе од една апликација;

• вклучете ја локацијата на телефонот;

• погледнете ТВ прогноза.

Заклучокот на експертите е јасен – процентите на шанса за дожд се многу поважни од иконите или симболите, а прецизната локација и повеќе извори на прогноза можат да ве спасат од „мокро изненадување“.