Подот, кој на почетокот бил обична шперплоча, го претворила во површина што многу уверливо имитира темни дрвени штици.

Како за малку пари да добиете дрвен под

Во објава на Редит под наслов „Не можев да си дозволам дрвени подови – па направив имитација со маркер“ детално ја опишала постапката и објаснила дека во ходникот имала шперплоча која потоа ја преобразила.

„Плочите од шперплоча во нашиот ходник на катот ги претворив во дрвени ‘штици’ со помош на маркер и линијар“, напишала таа.

„Ги избрусив дамките од боја што ги оставил претходниот сопственик, а со маркер исцртав прстени и чворови на деловите што не можев да ги прикријам со лазура. Презадоволна сум од резултатот!“.

Објавата од 15 февруари го прикажува целиот процес – од почетната состојба на подот до завршниот изглед со рачно исцртани линии. Во други објави се гледа и дека остатокот од нејзиниот дом е уреден во максималистички стил: впечатливи розови, жолти и виолетови нијанси, тапети со дезен, па дури и скали во диско-стил.

Луѓето на Редит воодушевени од проектот

Објавата досега собра повеќе од 1900 лајкови, а во коментарите луѓето ја пофалија и идејата и конечниот изглед на подот. „Мислам дека е прекрасно“, напишала една личност. Друг корисник додал: „Искрено, изгледа подобро од оние сиви штици за кои луѓето плаќаат вистинско богатство. Секоја чест!“.

Многумина го истакнаа шармот на несовршениот, рачно изработен изглед. „Ми се допаѓа што се малку нерамномерни, како да сте нашле стари штици и од нив сте составиле под. Необично, забавно и досетливо“, стои во еден коментар. За многумина овој проект не е само начин на заштеда, туку и доказ дека креативноста понекогаш може да ги надмине скапите реновирања.

DIY проектите се сè попопуларни

Оваа вирална објава доаѓа во време кога сè повеќе луѓе се свртуваат кон DIY проекти за да ги намалат трошоците. Истражување што во јули 2025 година го спровела компанијата „Talker Research“ на примерок од 2000 Американци покажало дека 80 проценти од испитаниците чувствуваат дека имаат поголема контрола врз работите кога се занимаваат со домашни поправки и проекти, особено во време на финансиска неизвесност.

Поради растот на цените, повеќе од половина од испитаниците велат дека денес попрво поправаат отколку што купуваат ново – првенствено поради заштеда (61 процент) или затоа што не можат да си дозволат замена (33 проценти). Тој тренд се поклопува и со промените во навиките и вкусот за уредување на домот.

Во друга анкета на истата компанија, спроведена на 2000 американски сопственици на куќи, 83 проценти од испитаниците се согласиле дека домот со текот на времето може да го изгуби својот изворен шарм и да почне да делува застарено. Иако многумина и понатаму ги ценат класичните елементи како оригиналните дрвени подови (56 проценти) и декоративната столарија (37 проценти), значително е помала носталгијата за детали како текстурирани тавани, кои ги претпочитаат само 8 проценти од испитаниците.