Норвешкиот биатлонец Стурла Холм Легрејд ја шокираше спортската јавност откако, само неколку моменти по освојувањето на бронзениот медал на Зимските олимписки игри, во телевизиски пренос во живо призна дека ја изневерил девојката.

Легрејд денеска освои бронза во машката индивидуална трка на 20 километри на Игрите во Италија, но славјето речиси веднаш падна во втор план. Во интервју за норвешката телевизија НРК, 28-годишниот спортист, видно потресен, реши јавно да го каже она што, како што рече, го носел во себе со месеци. Видеото погледнете го ТУКА.

„Пред шест месеци ја запознав љубовта на мојот живот, најубавата и најпрекрасната личност на светот. А пред три месеци ја направив најголемата грешка во животот – ја изневерив“, рече Легрејд низ солзи.

Додаде дека зад него е најтешката недела во животот, а потоа емотивно продолжи:

„Имав злато во мојот живот … Имам очи само за неа. Не знам што сакам да постигнам со овие зборови, но спортот последниве денови беше во втор план. Би сакал ова да можам да го споделам со неа.“

Норвежанецот нагласи дека сака да биде добар пример, но пред сè мора да ги признае сопствените грешки.

„Мораш да признаеш кога ќе направиш нешто со кое не можеш да живееш и кога ќе повредиш личност што најмногу ја сакаш“, порача тој.

Поделени реакции во јавноста

Неговата исповед предизвика лавина реакции на социјалните мрежи. Додека едни ја пофалија искреноста, ранливоста и храброста да ја признае грешката пред целиот свет, други го исмејуваа јавниот настап, тврдејќи дека довербата не се враќа со „холивудски монолози пред камерите“.

Бронзениот медал во Антхолц-Антерселва беше првиот олимписки медал во кариерата на Легрејд, освоен во исклучително напната трка. Златото му припадна на неговиот сонародник Јохан-Олав Ботн, додека среброто го освои Французинот Ерик Перо.

Иако медалот беше историски, вечерта ја одбележа исповед каква ретко се гледа на Олимписките игри – момент во кој спортот целосно падна во сенка на животната вистина изговорена во живо пред милиони гледачи.