Сопругата на лингвистот и филозоф Ноам Чомски, Валерија, се извини во соопштение велејќи дека таа и нејзиниот сопруг направиле „сериозна грешка“ во однос на американскиот финансиер и осуден сексуален престапник Џефри Епстин и дека не го истражиле темелно неговото минато, пренесе денеска „Гардијан“.
Валерија Чомски додаде дека Епстин ги измамил и дека биле „невнимателни“.
Односот меѓу Чомски (97) и Епстин се најде под јавен надзор откако документите објавени од Министерството за правда на САД го обелодени нивното пријателство.
Кога Епстин се нашол во фокусот на јавноста поради обвинувања за сексуална експлоатација во 2019 година, тој побарал совет од Чомски за тоа како да одговори.
„Видов колку ужасно се однесуваат кон вас во печатот и јавноста. Болно е да се каже, но мислам дека најдобриот начин е да се игнорира тоа“, напишал Чомски во порака потпишана со „Ноам“ што Епстин ја споделил во е-пошта со соработник.
Чомски додал дека она што мршојадците го посакуваат е јавен одговор, кој потоа дава јавна можност за низа отровни напади, од кои многумина доаѓаат од баратели на публицитет или од чудаци од сите видови.
„Ова е особено точно сега со хистеријата што се разви околу злоупотребата на жените, која достигна точка каде што дури и доведувањето во прашање на обвинението е злосторство полошо од убиство“, му пишал Чомски на Епстин.
Ноам Чомски е еден од неколкуте истакнати лица за кои е утврдено дека биле во пријателска комуникација со Епстин, дури и по неговото признание на вина во 2008 година.
Многумина сега се соочуваат со преиспитување на нивниот однос со осудениот сексуален престапник.
Некои од комуникациите на Чомски со Епстин се случиле откако „Мајами Хералд“ објавил шокантна приказна во 2018 година во која детално се опишува како тој злоупотребувал малолетни девојчиња и добил невообичаено лесна спогодба за признавање на вина во 2008 година.
Валерија Чомски признала дека таа и сопругот ја прочитале приказната, но рекла дека не биле свесни за обемот на злосторствата на Епстин сè до неговото второ апсење во јули 2019 година.
„Бевме невнимателни што не темелно ја истраживме неговата заднина. Ова беше сериозна грешка и за тој пропуст во проценката, се извинувам во име на двајцата. Ноам ми рече, пред мозочниот удар, дека се чувствувал исто“, рече таа. (Чомски доживеал тежок мозочен удар во 2023 година). „Беше длабоко вознемирувачки за двајцата да сфатиме дека сме се дружеле со некој што се претставувал како пресретлив пријател, но водел скриен живот исполнет со криминални, нехумани и перверзни дела“, додала таа.
Пред десет дена, Министерството за правда на САД објави приближно 3,5 милиони досиеја за случајот на Епстин, кој во 2019 година бил обвинет во САД за трговија со малолетници заради сексуална експлоатација.
Во јули истата година, Епстин починал во затвор, а официјалната причина за смртта е самоубиство.
