На сцената се појави во комбинација составена исклучиво од накит наместо топ и раскошно црвено балско здолниште, со што оддаде почит на култната сцена од филмот „Death Becomes Her“. Овој изглед веднаш го привлече вниманието на модните познавачи, а Доечи го интерпретираше на целосно автентичен начин, пишува „InStyle“.

Накит наместо горен дел

По прошетката по црвениот тепих во салата „Crypto.com Arena“ во Лос Анџелес, Доечи се пресоблече за излегувањето на сцената, каде што ѝ се придружи на Квин Латифа за време на доделувањето на Греми наградата за најдобар рап албум.

Горниот дел од нејзината комбинација беше златен ѓердан со внимателно распоредени разнобојни скапоцени камења кои се спуштаа по нејзините гради. Овој провокативен моден елемент, авторката на хитот „Anxiety“ го искомбинира со раскошно балско здолниште во боја на роза, со сатенски спуштен струк, покриено со лелеави перја. Изгледот го надополни со голема златна нараквица и соодветна чанта.

Што се однесува до шминката, Доечи блесна со сјајна кожа, нагласени трепки, светкава сенка и сјајни усни. Носеше нокти во боја на шампањ, додека својата кафеава коса ја стилизирала во волуменозна пунџа.

Само еден или два часа претходно, на црвениот тепих пристигна во сензуален фустан по мерка со потпис на „Roberto Cavalli“. Креацијата беше комбинација од горен дел на врзување во портокалова нијанса и корсет во кралско-виолетова боја, со исклучително долг шлеп украсен со златни монистри и богати набори.

Стајлингот го заокружи со сиви сандали со светки, слоевити нараквици и висечки обетки.

Ова е трето појавување на раперката на доделувањето на Греми наградите. Деби настапот го имаше во 2022 година, а се врати и минатата година, кога оствари забележителен настап и ја освои наградата за најдобар рап албум. Тогаш носеше сив фустан со пруги од „Tom Browne“ преку бела кошула, а комбинацијата ја надополни со мокасини со платформа.