[ВИДЕО] Излезе трејлерот за новиот „Super Mario Galaxy Movie“

„Nintendo“ и „Illumination“ го објавија официјалниот трејлер за „The Super Mario Galaxy Movie“, продолжение на „The Super Mario Bros. Movie“, и веднаш го ставија фокусот на ликот што фановите го очекуваа уште од post-credit сцената. Во трејлерот конечно се гледа Јоши во акција, а покрај него се појавуваат и нови ликови и power-up елементи, што е јасна порака дека овојпат приказната оди уште пошироко и „повселенски“.

Најконкретната вест покрај трејлерот е датумот: филмот е поместен и сега излегува на 1 април 2026 година во САД и на голем број дополнителни пазари, додека Јапонија е посебно наведена за 24 април 2026 година, со напомена дека некои земји ќе имаат премиери во текот на истиот месец. „Nintendo“ тоа го потврди и преку официјална објава.

Во самиот трејлер фановите веднаш почнаа да ги забележуваат деталите. Освен Јоши, се истакнува и Бирдо, а „GamesRadar“ го издвојува и „deep cut“ појавувањето на Маусер од „Super Mario Bros. 2“ (ако некогаш сте ја играле играта, точно знаете за кого станува збор). Накратко, и во новото продолжение авторите на филмот се потрудиле да вметнат што е можно повеќе познати елементи, но на начин што филмот ќе можат да го следат и луѓе кои не се енциклопедија на "Super Mario".

„Nintendo“ го најави трејлерот и „exclusive look“ преку посебен формат „Movie Direct“, што е интересно само по себе: филмот го третираат како голем настан во истиот календар како и игрите. „GamesRadar“ во најавата ги споменува и "Fire Mario" и "Fire Luigi" како дел од визуелниот правец на продолжението.

Што знаеме за актерската екипа: се враќаат Крис Прат (Марио), Чарли Деј (Луиџи), Анија Тејлор Џој (Пич), Џек Блек (Браусер) и Киган Мајкл Кеј (Тоуд), со истиот режисерски двоец (Арон Хорват и Мајкл Јелениќ). Како сценарист се наведува Метју Фогел, а музиката ја работи Брајан Тајлер.