Иако попустите навистина се како создадени за набавка на некои модни класици, одредени парчиња облека сепак е подобро да ги заобиколите.

Во продолжение советите на модните експерти за тоа што сепак е подобро да го прескокнете на попустите.

На попусти не купувајте:

Облека што ви е мала

Многумина барем еднаш на попуст купиле парче облека во несоодветна големина, со план „еден ден“ да влезат во истото. Вистината е дека шансите се големи тоа премало парче облека да заврши на дното од плакарот. Во секој случај, ако нешто ви е премногу тесно, подобро прескокнете го купувањето.

Нешто што воопшто не е во ваш стил

Налетавте на парче што никако не се вклопува во вашиот стил, но е на голем попуст, па се родила идејата дека треба да го купите. Сепак, немојте. Иако ниските цени нè ставаат во искушение да купиме нешто што инаку не го носиме, голема е веројатноста да завршите со нешто што воопшто нема да го носите.

Повеќе исти или слични работи што веќе ги поседувате

Кога станува збор за облека, често се држиме до нашата сигурна зона, па на попустите сакаме да трупаме парчиња слични на оние што веќе ги имаме во плакарот. Иако е добро да се држите до својот стил, сепак не ви се потребни десет исти или многу слични кошули или бели маици во плакарот.

Една од целите при купување на што било нека ви биде и можноста да креирате нови комбинации што се во согласност со вашиот стил.

Сè што е неудобно

Ако нешто не ви е удобно, ќе го облечете еднаш или воопшто нема да го облечете. Купувањето неудобна облека е фрлање пари. Ако нешто ве чеша, ви прави плускавци, тешко се закопчува… или ви создава кој било друг проблем, заобиколете го тој модел. Работите нема да се променат во иднина, а само ќе потрошите пари и ќе го натрупате плакарот со непотребни парчиња.

Парчиња облека што не можете да ги замислите како дел од вашите комбинации

Ако нешто ви изгледа симпатично, но не можете во глава да визуализирате комбинација во која би го вклопиле тоа парче, подобро прескокнете го. Ако ве мачи прашањето како да го стилизирате парчето облека, сфатете го тоа како знак дека станува збор за артикл што нема да функционира со остатокот од вашиот плакар.