Последните 25 години донесоа огромни технолошки промени. На почетокот на 2000-тите интернетот беше бавен, „Netflix“ испраќаше „DVD“-а по пошта, а паметните телефони речиси и не постоеја. Денес „AI“, роботиката и другите технологии се развиваат со неверојатна брзина, па експертите се обидуваат да предвидат како ќе изгледа светот во 2050 година.
Спојување на луѓето и технологијата
До средината на векот, границите меѓу биологијата и технологијата би можеле значително да се замаглат. Нанотехнологијата, која веќе денес ги придвижува компјутерските чипови, би можела да се користи за импланти што го следат здравјето, ја подобруваат комуникацијата или прецизно доставуваат лекови во телото.
Професорот по кибернетика Кевин Ворвик верува дека електронската стимулација на мозокот ќе стане дел од лекувањето на одредени болести, а кибернетските подобрувања ќе овозможат нови начини на поврзување на мозокот и телото.
Покрај тоа, би можеле да имаме и „дигитални близнаци“ – виртуелни модели на нашето тело со чија помош би тестирале лекови, диети или стил на живот без реален ризик.
Иднината на вештачката интелигенција
„AI“ ќе има клучна улога во наредните децении, а квантното компјутерство би можело дополнително да го забрза нејзиниот развој. Квантните компјутери би овозможиле исклучително брзи и сложени пресметки, како што е развојот на нови лекови.
Во образованието се очекува премин кон учење преку виртуелни и физички симулации, со „AI“-наставници што се приспособуваат на секој ученик. Наставата би била помалку стандардизирана, а повеќе приспособена на индивидуалните биолошки и когнитивни особености на децата.
Сообраќај и вселена
Автономните возила би можеле речиси целосно да ги отстранат сообраќајните метежи и значително да го намалат бројот на несреќи. Автомобилите би се движеле поблиску еден до друг и би реагирале синхронизирано.
Во вселената се очекува продолжување на трката – можно е до 2050 година да постои постојана база на Месечината, а дел од индустријата, како фармацевтската, да се пресели во орбита поради предностите на микрогравитацијата.
Научна фантастика иреалност
Филмови како „Minority Report“ покажаа како идеите од научната фантастика често се претвораат во реални технологии. Иако иднината понекогаш се прикажува како мрачна и опасна, многу експерти потсетуваат дека науката низ историјата донела повеќе корист отколку штета.
Како што напишал Филип К. Дик: Науката ни дала повеќе животи отколку што ни одзела — и тоа не треба да се заборави.
