И додека некои луѓе искрено обожаваат сè што ќе добијат на подарок, други ќе се насмевнат, ќе се заблагодарат и дури подоцна, во мирот на својот дом, ќе се запрашаат кому би можеле да му го дадат тој подарок. Ако некогаш ви поминало низ глава дека не е до вас, туку до нив – можеби сте биле во право.

Хороскопскиот знак често открива повеќе за нечиј вкус отколку што мислиме. Затоа, во празничен дух, ви носиме забавен водич низ подароците што секој знак потајно не сака да ги пронајде под елката, иако тоа веројатно никогаш нема да ви го каже гласно.

Овен

Овните сакаат енергија, брзина и чувство дека нешто се случува веднаш. Затоа подароците што бараат часови мирно седење, како комплицирани сложувалки, комплети за хеклање или долготрајни „направи сам“ проекти, ги излудуваат. Не затоа што не го ценат трудот, туку затоа што немаат трпение за бавно темпо.

Бик

Биковите имаат изострено чувство за квалитет и удобност, па најмногу ги разочаруваат подароците што само глумат луксуз. Евтина мирислива свеќа, шал што уште при првиот допир делува синтетички или чаши што звучат шупливо – сето тоа се детали што Бикот ги забележува веднаш. Повеќе би сакал една навистина добра работа отколку три просечни.

Близнаци

Близнаците живеат од љубопитност и стимулација, па подароците без каква било лична нота ги оставаат рамнодушни. Еднобоен нотес, класично пенкало или книга со премногу сериозен наслов нема да ги воодушеви. Ако подарокот нема барем една интересна приказна или детаљ што можат да го прераскажуваат, брзо им станува здодевен.

Рак

Раковите се емотивни и за нив не е важно колку чинел подарокот, туку колку се чувствува вниманието. Ваучер без порака, генерички козметички сет или нешто купено во последен момент им делува студено и безлично. Ракот сака да знае дека сте мислеле токму на него, и тоа ќе му биде поважно од самиот предмет.

Лав

Лавовите сакаат подароци што се забележуваат, што имаат став и што оставаат впечаток. Дискретен, неутрален подарок во беж или сива боја им делува како да сте играле на сигурно, а Лавот не сака сигурна игра. Не мора да биде скап, но мора да има карактер, затоа што Лавот сака да се чувствува посебен.

Девица

Девиците се практични и аналитични, па најмногу ги нервираат подароците што немаат јасна намена. Декорации што собираат прашина, уреди што не функционираат како што треба или производи со слаб квалитет брзо ќе бидат заборавени. Девицата ќе ви се заблагодари, но во себе ќе ја анализира секоја маана.

Вага

За Вагата естетиката е клучна, а подарок што визуелно не е усогласен за неа е вистинска мала трагедија. Кичести детали, несоодветни бои или предмети што не се вклопуваат во ниту еден стил на ентериер ги ставаат во непријатна позиција, бидејќи не знаат каде воопшто да ги сместат без да ја нарушат рамнотежата.

Шкорпија

Шкорпиите сакаат длабочина и приватност, па премногу личните подароци од погрешна личност можат сериозно да ги извадат од такт. Парфем, интимна козметика или облека од некој што не им е близок делуваат како нарушување на границите. Шкорпијата ја цени намерата, но уште повеќе го цени просторот.

Стрелец

Стрелците се вљубеници во слободата и искуствата, па најмногу ги гушат подароците што ги врзуваат за едно место. Тешки декорации, масивни вазни или предмети без каква било приказна нема да ги израдуваат. Тие сакаат подароци што носат чувство на движење, патување или барем фантазија.

Јарец

Јарците се рационални и ориентирани кон долгорочното, па ги иритираат подароците што немаат никаква практична вредност. Скапи, но бескорисни дизајнерски предмети или трендовски детали што брзо излегуваат од мода кај нив предизвикуваат само тивко негодување. Јарецот сака смисла, трајност и функција.

Водолија

Водолиите не поднесуваат генеричност. Класична шолја со натпис, идентична маица каква што имаат сите или подарок купен без вистинска желба нема да ги импресионира. Тие сакаат нешто поинакво и неочекувано.

Риби

Рибите се чувствителни и интуитивни, па студени, иронични или цинични подароци можат да ги повредат. Шеговити предмети без емоција или со груби пораки нема да им „легнат“, затоа што Рибите бараат симболика и топлина. За нив е важно како се чувствуваат со подарокот, а не што точно има во кутијата.