Травел блогерката Лин на својот блог „Mad Hatters NYC“ вели дека може точно да објасни што ја привлекло кон Грција.

„Моите родители беа таму на одмор кога бев девојче, прво патување за кое се сеќавам дека некогаш патувале некаде, и тоа истовремено беше едно од многу ретките патувања на кое уживале без деца.“

Како што вели, нејзините родители се вратиле со приказни за егзотична странска земја кои ја оставиле без зборови.

„Додека пред пријателите и семејството го раскажуваа своето доживување, јас го впивав секој нивен збор. Веќе тогаш знаев дека сакам да ја видам со свои очи еден ден.“

Кога конечно, како возрасна, се упатила на своите патувања, Атина ѝ била возбудлива мешавина на старо и ново, додека Санторини бил целосно во драматични погледи.

„Но, Нафплион беше грчка дестинација која најмногу се поклопуваше со романтичната слика што ја негував со години во мојата глава уште како дете.“

Каде се наоѓа Нафплион?

Нафплион се наоѓа во регионот Пелопонез во Грција, кој е полуостров на југот на земјата. Од копното е одделен со Коринтскиот теснец и Коринтскиот канал.

Долго време сметан за запоставена дестинација, Пелопонез во последните години значително ја зголеми својата популарност. Нафплион е оддалечен само 90 минути возење од Атина, што го прави совршено место за еднодневен излет или за кратко зимско бегство од неколку дена.

Грчката митологија во Нафплион

Секој љубител на грчката митологија ќе најде многу приказни кои се одвиваат на Пелопонез. Нафплион го добил името по својот основач Науплиј, син на Посејдон и Аминона. Посејдон, богот на морето, е еден од 12-те главни богови во грчката митологија. Тој е брат на Зевс и се борел со него во војната во која го симнале од престолот својот татко Кронос и останатите титани.

Таткото на Аминона, кралот Данај, ја испратил да најде вода за време на суша. За време на својата потрага, Аминона фрлила копје кон елен, но го погодила заспаниот Сатир, кој се разбудил и се обидел да ја нападне. Тогаш се појавил Посејдон, па Сатир побегнал; потоа самиот Посејдон водел љубов со неа, по што ѝ ги открил изворите на Лерне и така го спасил народот од суша.

Историјата на Нафплион

Нафплион имал важна улога низ голем дел од грчката историја. Пристаништето отсекогаш било вредна упориште, а Нафплион не бил исклучок. Го освојувале Французите, Венецијанците, Турците и Русите. Во грчки раце се вратил во 1822 година, кога го ослободил генералот Колокотронис, а во 1828 година станал главен град на Грција.

Грција четири години подоцна станала монархија, а нејзиниот прв крал, 17-годишниот Ото Баварски, живеел во Нафплион. Две години подоцна ја преселил престолнината во Атина. Траговите од сите овие различни империји може да се видат во градот и денес, а Нафплион често се нарекува и „грчката Венеција“.

Уметноста на уживање во Нафплион

Две главни атракции во Нафплион се остатоците од венецијанското владеење: Буртзи, мала тврдина на островче, и замокот Паламиди.

Тврдината Буртзи во есен и зима изгледа како да е од некоја бајка, бидејќи речиси магично исчезнува во магливиот пејзаж.

Покрај тоа, само лесна прошетка низ стариот град е прекрасен начин да го поминете зимскиот ден малку поинаку.

Заборавете на мапи и планови и едноставно прошетајте по живописните улици. Ѕирнете во шармантните продавници и тивките улички. Застанете на кафе или топло чоколадо.

Облечете се топло и прошетајте до плажата Арванитија и ќе видите како во ова место функционира уметноста да не правите ништо.

Посетете ги планинските села околу овој град и опуштете се покрај пукотот на камин и мирисот на леб печен во фурна.

Можете да ги посетите и градските музеи, како и малите продавници каде што ќе ги запознаете локалците.

На крај, пронајдете ја вашата омилена таверна и организирајте романтично вечерно дружење со вино.