„Severe Weather Europe“ објави најнова прогноза за зимата, која би можела да биде значително постудена од просекот во големи делови на Северна Америка и Европа.

Главни виновници за ова се слаба до умерена Ла Ниња во Тихиот Океан и очекувано големо нарушување на поларниот вртлог(polar vortex), вклучувајќи настан на ненадејно стратосферско загревање. Овие фактори би можеле да доведат до рано продирање на студен воздух и поголеми снежни врнежи уште од декември, со можност за продолжување на студениот бран во јануари.

Поларниот вртлог, голем циклон на студен воздух над Арктикот кој се протега од површината до стратосферата, би можел да доживее сериозно нарушување веќе кон крајот на ноември. Прогнозите покажуваат ненадејно стратосферско загревање, што би можело да доведе до целосен колапс на вртлогот, пренесува „Večernji list“. Такви настани историски носат изразена студенило во Канада и поголем дел од САД (освен југозападот), додека во Европа ладењето е нешто помалку изразено, најмногу во северните и централните делови.

Снег во декември

Поголемиот дел од САД и јужна Канада ќе бидат постудени од просекот, со изразени продори на студен воздух, а се очекува и зголемена количина снег. Во Европа ќе преовладува дисполарен образец со антициклон на север и циклони на југ и во централниот дел на континентот, што овозможува источни и североисточни ветрови, како и температури од просек до под просек во западна и централна Европа. Прогнозата за снежни врнежи исто така изгледа ветувачки, со солидна количина на снежна покривка што се шири низ континентот. Ова е еден показател за поволен образец на притисок/температура, кој обезбедува доволно студен воздух за да се овозможат снежни врнежи.

Јануари со помалку врнежи

Студот продолжува во северните и источните делови на САД и јужна Канада, додека југот и југозападот на САД преминуваат на потопли услови. Во Европа температурите се неутрални до благо постудени во централниот и североисточниот дел, со помалку врнежи од вообичаеното, што е показател за области со повисок притисок и веројатно сушни/постудени воздушни маси од североисток.

Пресврт во февруари

Во последниот зимски месец доаѓа до промена – поларниот вртлог делумно се обновува, задржувајќи постуден воздух во поларните региони. Во Европа преовладуваат температури над просекот, но со можност за постуден почеток на месецот и потопол крај, или обратно. Северните делови на Европа покажуваат поголеми врнежи поради влијанието на области со низок притисок, додека централните и западните делови имаат врнежи близу просекот за овој месец.