Кипарската пејачка Антигони, која живее и работи во Лондон, ќе го претставува Кипар во Виена, а ја избра интерно националната телевизија „Сај-би-си“, пренесува „Евровижн Ворлд“.

Песната со која Антигони ќе се појави на евровизиската сцена ќе биде објавена подоцна. До тогаш, публиката може да се запознае со нејзиниот музички стил преку една од поновите песни – „Habibi“.

Која е Антигони?

Антигони Бакстон е британско-кипарска пејачка и авторка на песни од северен Лондон. Таа е ќерка на грчко-кипарската ТВ-водителка и готвачка Тони Бакстон, а пораснала опкружена со британска и кипарска култура.

Своите први песни ги пишувала уште како тинејџерка, а подоцна ја учела во престижното „BRIT School“ во Лондон, познато по талентите како Адел и Ејми Вајнхаус.

На почетокот на дваесеттите години потпишала договор со „Исланд екордс“ и почнала да го развива својот препознатлив звук, мешавина од поп и аренби со медитерански звук и грчка инструментализација. Досега има објавено неколку синглови, меѓу кои „Long Way Home“, „Never Gonna Love“ и „Hit List“, а често користи двојазични текстови кои го одразуваат нејзиниот британско-кипарски идентитет.

Пошироката јавност ја запозна во 2022 година со учеството во британското ријалити шоу „Love Island“, што ѝ донесе голема популарност во Обединетото Кралство и Кипар. Нејзината популарност продолжи да расте и на социјалните мрежи, денес има 595 илјади следбеници на Инстаграм, кои ја следат не само поради музиката, туку и поради нејзиниот впечатлив изглед.

Кипар учествува на Песна за Евровизија од 1981 година, но сѐ уште нема освоено прво место. Најдобриот резултат досега го постигна во 2018 година, кога Елени Фуреира заврши на второто место со песната „Fuego“. Од воведувањето на полуфиналето во 2004 година, Кипар се квалификувал во финале 12 пати од 20 обиди.