Кирк, основач и извршен директор на „Turning Point USA“,  често ја нагласувал важноста на бракот и семејството, а зад себе ја остави сопругата Ерика, која често го придружувала на разни политички настани и нивните две деца – синот кој неодамна го прославил својот прв роденден и ќерката која наполнила три години во август.

Објавата која неговата 36-годишна сопруга Ерика Кирк ја сподели на социјалната мрежа X неколку часа пред атентатот, привлече посебно внимание.

„Бог е наше засолниште и сила, секогаш присутна помош во тешки времиња“, напишала Ерика.

Нејзината објава сега стана место каде што оние што се во жалост реагираат со почит и сочувство откако нејзиниот сопруг Чарли Кирк беше смртно застрелан, а многумина коментираа дека објавата е многу симболична во контекст на фактот дека речиси ја најавува претстојната трагедија.

Брачен живот

Ерика минатата година на Инстаграм откри како започнала нивната љубов. Таа и Кирк биле на нивниот прв состанок во Њујорк пред седум години. Се запознале во септември 2018 година и до крајот на вечерта од нивниот прв состанок, таа знаела дека се предодредени еден за друг. Двојката се свршила во декември 2020 година, а се венчале во мај 2021 година во нејзиниот роден град Скотсдејл.

Во април, тие учествувале заедно во епизода од поткастот „Шоуто на Чарли Кирк“ во која зборувале за бракот и семејниот живот. Ерика потоа рекла:

„Мора постојано да инвестирате во меѓусебна доверба, да бидете на иста страна, да се поддржувате, да се сакате еден со друг.“

Според информациите достапни на социјалните мрежи, Ерика дипломирала во 2012 година политички науки и меѓународни односи. Според нејзиниот профил на „LinkedIn“, во 2017 година магистрирала по американско право (Juris Master) на Универзитетот Либерти, а во 2022 година го одбранила докторатот по образование.

Додека студирала на Државниот универзитет во Аризона, била крунисана за Мис Аризона 2012. Се натпреварувала и како Мис Феникс, а потоа ја претставувала Аризона на изборот за Мис САД.

Својот деловен успех го продолжила во областа на недвижностите, па денес работи како агент на њујоршката агенција The Corcoran Group, а е и основач на непрофитната организација „Everyday Heroes Like You“, која се занимава со јакнење на заедницата.

Исто така, во 2018 година, таа го основала „Proclaim Streetwear“, бренд за облека од религиозна природа.