Најголемиот трговски центар на светот, за кој веројатно не сте ни слушнале, зафаќа неверојатни 160 хектари и содржи огромен кино-комплекс, тематски парк, па дури и џиновска библиотека. И тоа е само врвот на ледениот брег кога станува збор за понудата на оваа купувачка оаза лоцирана во Техеран!
Овој „шопинг рај“ има сè – од штандови со гурманска храна до најлуксузните бутици – и тоа на сосема неочекувано место, пишува "The US Sun".
Трговските центри често се гордост на големите метрополи, од "Dubai Mall" до "Mall of America". Но, оној што е крунисан како најголем на планетата, гордо се наоѓа на Блискиот Исток.
"Iran Mall" е официјално најголемиот трговски комплекс некогаш изграден, со стотици продавници, ресторани, забавни содржини и хотел – распоредени на седум ката.
Овој мегакомплекс се протега на 1,95 милиони квадратни метри, што е приближно 246 фудбалски игралишта, и се наоѓа во близина на езерото Читгар во главниот град Техеран.
Центарот беше отворен во 2018 година, по четиригодишна изградба во која учествуваа 25.000 работници.
Дизајнот е инспириран од најдобрите примери на современа иранска исламска архитектура, со куполи, технички комплексни лакови и стотици традиционални ирански орнаменти.
Освен културните елементи, молот нуди светла и динамична атмосфера благодарение на големите прозорци и стаклени покриви.
Но, неговиот изглед е само еден дел од причините зошто "Iran Mall" е и туристичка атракција и локално чудо.
Молот има повеќе од 700 бренд продавници, и ако потрошите само 5 минути во секоја, ќе ви требаат речиси три дена за да го обиколите целиот комплекс, според компанијата "Eavar".
Купувачите можат да најдат сè – од облека и декорации до храна и технолошки уреди – во комбинација на локални и меѓународни брендови.
"Iran Mall" се гордее со најсовремениот кино-комплекс во Иран, со 12 "IMAX" сали, модерна концертна сала со 2.000 места, музеј, неколку уметнички галерии и спортски објекти, меѓу кои: тениски терени, терен за хокеј на мраз, спортски центар и фитнес сала.
Во тек е изградба на базен и спа центар.
Две од највпечатливите атракции се најсовремената музичка фонтана во светот и џиновска библиотека.
Библиотеката Џондишапур содржи над 45.000 книги, ракописи и документи.
Фонтаната се протега од источниот до западниот дел од молот и е видлива од секое ниво.
На вториот кат, посетителите се обидуваат да ги најдат своите автомобили меѓу илјадници паркинг места, а можат и да одиграат партија куглање во комплетно опремена куглана.
Додека родителите купуваат или уживаат во содржините, децата можат да се забавуваат во затворениот тематски парк со ролеркостер, соба со ласери, аркадни игри и дури и детско театарче.
За локалните жители и муслимански патници, џамијата во рамки на молот е еден од најсветите простори – со величествена архитектура и декорации од тиркизни, азурни и бели плочки, инспирирана од дизајнот на Големиот базар.
Различните куполи во молот се инспирирани од прочуената Хафезија во Шираз.
Популарна е и Салата со огледала, составена од 38 милиони парчиња стакло, инспирирана од познатата сала со огледала во Националното собрание – блескава во текот на денот.
Во тек е изградбата на луксузен хотел и меѓународен конгресен центар.
"Iran Mall" постави и Гинисов рекорд за најдолго непрекинато излевање бетон – шест дена континуирано бетонско лиење за дел од структурата.
За време на пандемијата од ковид-19, дел од молот беше претворен во привремена болница со 3.000 кревети, а подоцна и во најголемиот центар за вакцинација во Иран.
