Археолозите дошле до неверојатно откритие во водите во близина на Сен Тропе, на југоистокот од Франција. Остатоци од трговски брод од 16 век биле пронајдени на длабочина од повеќе од 2,5 километри и претставуваат најдлабока руина откриена во француските води. Ова револуционерно откритие беше претставено во извештајот на Франс 24 и се очекува да им обезбеди на археолозите богатство од информации за трговските патишта во Медитеранот за време на ренесансата.

Се верува дека бродот пловел од северна Италија, носејќи товар од керамика и метални прачки пред да потоне. Иако има и траги од современ отпад, како што се конзерви и пластични чаши од јогурт, археолошкото наоѓалиште е исклучително добро зачувано и нуди неверојатен увид во минатото, пренесе „Indiandefencereviw“.

Руината од бродот била пронајдена на длабочина од 2.567 метри (повеќе од 1,5 милји) под површината на Средоземното Море. Според Арно Шомаси, раководител на одделот за подводна археологија при француското Министерство за култура, ова е „најдлабоката руина досега пронајдена во француските територијални води“.

До откритието дошле кога подводен дрон случајно наишол на остатоци од брод во март 2025 година за време на рутинско истражување на морското дно. Дронот, кој е дел од владиниот проект за следење на длабокоморските ресурси на Франција, забележал нешто големо во областа. „Сонарот открил нешто доста големо, па се вративме со камерата од дронот, а потоа и со подводен робот кој направи слики со висока резолуција“, рече Шомаси, опишувајќи ги клучните чекори што довеле до потврда на откритието.

Зачувано како временска капсула

Поморските археолози биле воодушевени од неверојатниот степен на зачуваност на руината, бидејќи длабочината на која се наоѓа не дозволувала извлекување или грабеж. Археологот Марин Саданија, која учествувала во проектот, објасни дека „местото – благодарение на длабочината која спречувала каква било интервенција – останало недопрено, како времето да застанало, што е исклучително ретко“.

Локацијата, која е именувана како „Камарат 4“, содржи богатство од историски предмети што нудат увид во трговијата во Медитеранот во текот на 16 век. Археолозите пронашле 200 бокали, од кои некои биле обележани со монограмот „IHS“, што ги претставува првите три букви од грчкото име Исус. Овие ознаки укажуваат дека бокалите потекнуваат од регионот Лигурија, во северна Италија. Покрај нив, истражувачите идентификувале и 100 жолти чинии, два котли, едно сидро и шест топови – сите неверојатно добро зачувани и покрај староста на руината.

Откривање на недопрен комерцијален товар

Товарот на бродот дава редок увид во поморската трговија за време на ренесансата. Бокалите, кои веројатно се користеле за транспорт на течности или житарки, се богато украсени, некои со геометриски шари, а некои со растителни мотиви. Присуството на метални прачки во товарот дополнително потврдува дека се работело за трговски брод, веројатно наменет за мрежа на размена на стоки во Медитеранот.

Покрај бокалите и металите, присуството на предмети како што се котли и топови укажува дека бродот бил трговски брод, но исто така и вооружен за сопствена заштита за време на пловидбата. Шесте топови се фасцинантен потсетник на бурната поморска историја од 16 век, кога пиратството и поморските конфликти биле постојана закана за трговските бродови.

Современ отпад и зачувување

Иако локацијата е претежно недопрена, бил забележан и современ отпад. Тимот истражувачи забележал, меѓу другото, конзерва и празна чаша од јогурт. Сепак, длабочината на која се наоѓа руината одиграла клучна улога во нејзиното зачувување. Како што истакна Саданија, „местото останало недопрено, како времето да застанало, што е извонредно“. Отсуството на човечка интервенција низ вековите овозможило товарот на бродот и другите артефакти да останат во голема мера непроменети, давајќи им на истражувачите ретка можност да проучат морски брод од 16 век во неговата изворна состојба.