Државниот завод за индустриска сопственост ја додели највисоката државна награда за изуми, Патент на годината, на Борис Јанковски и Искра Јанковска-Михајловска од компанијата за истражување и развој „Веда“ за нивниот еколошки систем за гасење пожар.
„Веда“ е мала семејна компанија основана во 1991 година од инженерот и истражувач Јанковски, а сега ја раководи неговата ќерка Јанковска-Михајловска.
Изумот, наречен „Систем за сузбивање и гасење пожар во литиум јонски батерии и други затворени простори“, овозможува гасење на пожарот во самиот момент на неговото настанување, што претставува приоритет во оваа област. Клучна карактеристика на системот е употребата на супстанца која е меѓународно потврдена како нетоксична, што е особено значајно поради сè построгите регулативи на Европската комисија за емисија на токсични гасови.
„Супстанцата е погодна за употреба во станбени и јавни објекти, во простории каде престојуваат луѓе, и претставува безбедна алтернатива на постојните системи кои се во процес на повлекување во ЕУ поради нивната штетност за околината. Системот има широка примена – во електрични возила, камиони, автобуси, воена и полициска опрема, како и во системи за производство на енергија од сонце и ветер. Интензивно работевме на него за време на ковид кризата, со поддршка од Фондот за иновации, и сега е подготвен за индустриско производство“, објаснува изумителот Јанковски.
Овој пронајдок веќе има добиено меѓународно признание – прва награда на американски натпревар за висока технологија поддржан од американската армија и Министерството за одбрана на САД во 2022 година. Следната година, Искра Јанковска-Михајловска го доби признанието „Жена во фокус на технологијата“ во Вашингтон.
„Мило ми е што со оваа награда се заокружува домашната процедура. Планираме да го патентираме пронајдокот и во странство, што е многу важно за развојот на нашиот бизнис, бидејќи ние ги продаваме технологиите што ги создаваме. Без иновации нема напредок, па значењето на овој пронајдок ги надминува границите на нашата фирма и држава. Тој е важен за развојот на различни бизниси и истовремено ја штити животната средина“, изјави Јанковска-Михајловска.
