Празничната трпеза беше богата, а јајцата ги бојадисавте со љубов. Но, сега имате полн фрижидер со велигденски јајца. Наместо да ги заборавите и да се расипат, претворете ги во неодолив појадок кој сите ќе го обожаваат! Во продолжение ви донесуваме супер рецепти за полнети јајца – поинакви, вкусни, брзи и идеални како предјадење или појадок.

Без разлика дали сакате класичен вкус со мајонез и сенф, освежителен фил со краставички и копар, или пак нешто зачинето, полнетите јајца се совршен начин за искористување по Велигден. Во продолжение следуваат највкусните рецепти и идеи за полнети јајца, кои можете да ги послужите со тост, млад кромид или сезонска салата. Така, едноставниот појадок ќе добие празничен сјај!

Крцкави јајца со сланина

Состојки:

• 8 тврдо варени јајца

• 2 свежи јајца

• 3 лажици брашно

• 3 лажици презла

• 4 ленти сланина

За филот:

• 3 кисели краставички

• 3 лажици мајонез

• 4 лажици павлака

• 1 лажичка сенф

• Малку куркума

• Магдонос по вкус

• Сол и бибер

• 1 лажица масло

Подготовка:

Пресечете ги варените јајца по должина и извадете ги жолчките. Белките валкајте ги во брашно, разматено јајце и презла, па кратко испржете ги во врело масло. Исцедете ги на хартиена крпа. За филот, ситно исечкајте ги краставичките, измешајте ги со мајонез, павлака, пасирани жолчки и куркума. Зачинете, наполнете ги јајцата и одозгора посипете ги со крцкава, искршена сланина и магдонос.

Зачинети јајца со црвена пиперка

Состојки:

• 8 варени јајца

• 2 лажици презла

• 1 лажица црвена пиперка

За филот:

• 2 лажици мајонез

• 1 лажица кисела павлака

• 100 г шунка

• 2 кисели краставички

• Сол и бибер по вкус

Подготовка:

Пресечете ги јајцата, извадете ги жолчките. Белките кратко притиснете ги во мешавина од презла и пиперка и наредете ги. Жолчките измешајте ги со мајонез, павлака, ситно сечкана шунка и краставички. Наполнете ги белките со смесата и декорирајте по желба.

Јајца со цвекло

Состојки:

• 6 тврдо варени јајца

• 1 шолја сок од цвекло

• 1 лажичка сок од лимон

• 3 лажици мајонез

• 2 лажици рен

• 1 лажица рендан кромид

• 1 лажица сечкан магдонос

• Сол и бибер

Подготовка:

Излупените јајца натопете ги кратко во сок од цвекло, исцедете ги. Исечете ги на половина, извадете ги жолчките и изгмечете ги со мајонез, рен, кромид и зачини. Наполнете ги белките и декорирајте со магдонос.

Казино јајца со сардини

Состојки:

• 8 варени јајца

• 2 конзерви сардини во сос

• 1 лажичка лимонов сок

• 4–8 кисели краставички

• 100 г путер

• 2 лажички сенф

• Сол и бибер

Подготовка:

Жолчките изгмечете ги со сенф и растопен путер. Сардините изблендирајте ги со каперси и соединете ги со смесата. Наполнете ги белките со шприц.

Јајца со авокадо и горгонзола

Состојки:

• 8 тврдо варени јајца

• 1 зрело авокадо

• 80 г горгонзола

• 1 лажица павлака

• Ситно сечкан млад кромид

• Сол, бибер и лимонов сок

Подготовка:

Изгмечете го авокадото со жолчките, додадете горгонзола, павлака, кромид и зачини. Добро соединете и наполнете ги белките.