Но, паралелно со тоа се појави и важно прашање: што да се прави со батериите од користени или отпишани електрични возила?

Автомобилската индустрија со години бара решенија – од отворање капацитети за рециклирање на батерии, до проекти во кои старите "EV" батерии се пренаменуваат за системи за складирање енергија.

Досега овие системи беа специјализирани и главно користени внатре во самата индустрија, без поширока достапност за други корисници.

Но, тоа сега се менува.

"Volvo Energy" го претстави мобилниот систем за складирање и дистрибуција на електрична енергија

"Volvo Energy", оддел во рамки на групацијата "Volvo" (камиони, автобуси), го претстави новиот производ "PU500" – систем за складирање електрична енергија на батерии (BESS). Поедноставено, се работи за нешто што изгледа како огромна надворешна батерија за "iPhone", но наменета за полнење електрични камиони и машини.

"PU500" има капацитет меѓу 450 и 540 kWh и може да работи целосно автономно, без приклучок на електричната мрежа – идеално за оддалечени градилишта. Дополнително, може да се приклучи и на мрежа за побавно полнење.

Опремен е со интегриран "DC" полнач со моќност од 240 kW, што му овозможува брзо полнење на електрични возила или напојување на мобилни објекти, како приколки. Првенствено е наменет за полнење на тешка градежна механизација и камиони на локации без изградена електроинфраструктура.

„"PU500" со интегриран "CCS2" полнач е дизајниран за работа со сите брендови на електрична опрема – од камиони до патнички автомобили“, изјави Никлас Тулин, раководител на "BESS"-понудата во "Volvo Energy".

Идеално решение за градилишта во шума, возила за итни служби и кризни ситуации

Иако ваков уред би бил претеран за домашна употреба, "PU500" би бил извонреден за напојување електричен багер или за работа на градилишта без стабилен пристап до електрична мрежа.

Во иднина, ваков систем би можел да послужи и како итен извор на енергија за флоти на електрични возила, особено кај службите за спасување, овозможувајќи брзо полнење во случаи на прекин на струја на нивните бази.

"Volvo Energy" наведува дека целосно наполнетиот "PU500" може да наполни до 20 електрични автомобили дневно или еден тежок камион за приближно еден и пол час.

„"PU500" е доверливо, приспособливо и ефикасно решение, дизајнирано за потребите на бизнисите и индустриите на кои им е потребен флексибилен извор на енергија“, изјави Елизабет Ларсон, директорка за продажба и услуги во "Volvo Energy".

Подобра алтернатива од дизел генератори

Моментално, на градилишта најчесто се користат дизел генератори, но тие не се доволно ефикасни за полнење на цели камиони – не произведуваат доволно енергија за кратко време. Тука "BESS" и неговиот 240-киловатен полнач имаат огромна предност.

Единствениот предуслов? Потребно е значително зголемување на бројот на електрични градежни возила и машини – нешто што, според "Volvo", сè уште ќе бара време да се реализира.