Сите го знаеме тоа ужасно чувство кое се јавува кога ќе заборавиме зошто влеговме во соба и зошто сме имале намера да го направиме воопшто. Оваа секојдневна појава конечно била објаснета и не грижете се – тоа е сосема нормално.

Кристијан Џарет, когнитивен невронаучник и автор, објаснил за „Science Focus“ на Би-би-си дека она што сите го доживуваме се нарекува „ефект на вратата“.

Терминот се користи за чувството кое се случува кога луѓето забораваат на она по што всушност тргнале кога ќе влезат во нова просторија.

„Не грижете се, не сте единствените кои го доживеале ова вознемирувачко искуство“, рекол Џарет.

Како ефектот на вратата го зафаќа мозокот

Феноменот познат како „ефект на вратата“ се јавува затоа што нашиот мозок сака да ги дели активностите и информациите врз основа на контекстот на околината.

Кога се движиме од соба во соба, за мозокот, вратата е метафоричната граница помеѓу овие контексти. Тогаш мозокот сака целосно да го ресетира или ажурира своето моментално разбирање за новата средина.

Џарет, исто така, истакнал дека тимот од Универзитетот во Квинсленд дополнително го истражувал ефектот на вратата.

„Тие откриле дека минувањето низ вратите што поврзуваат идентични простории главно не влијае врз меморијата – можеби затоа што немало доволна промена на контекстот за да се создаде значајна граница на настаните“, рекол тој.

Џарет потоа додал дека „дури кога овие истражувачи им го одвлекле вниманието на волонтерите со истовремена секундарна задача, отворите меѓу идентичните простории влијаеле на меморијата“.

„Тимот од Квинсленд рече дека ова одговара на секојдневното искуство бидејќи, генерално, кога сме расеани, имаме тенденција да влеземе во соба и да заборавиме по што дојдовме“, додал експертот.

Џарет истакнал дека студијата укажала дека „ефектот на вратата“ е уште позначаен кога има големи промени во контекстот – на пример, ако одите од дневната соба во градината.

Како да не дозволите ефектот на вратата да ја преземе контролата

Невронаучникот рекол дека „новите резултати укажуваат и на потенцијален лек, а тоа е „да се обидете да останете фокусирани на целта кога ќе поминете низ вратата“, пренесе „Lad Bible“.

Иако тоа можеби звучи како премногу работа, Џарет предлага „секогаш да го запишете она што ви е потребно“.

„Јас лично ја користам апликацијата „Notes“ на мојот телефон за да ги евидентирам моите обврски. Но, дури и со сето тоа запишано, понекогаш не знам зошто одам во кујната да го барам далечинското на телевизорот“, заклучил тој.