"Toyota" има неколку причини зошто ја наплатува значително поскапо "Supra A90 Final Edition". Освен што го означува крајот на производството на актуелниот спортски автомобил, носи и значително зголемување на силата, како и бројни механички подобрувања.

Дополнително, производството е ограничено на само 300 примероци за Европа и Јапонија, што дополнително ја зголемува ексклузивноста на овој модел, пишува "Motor1".

Со оглед на сè построгите регулативи за емисија на гасови во Европа, ваков автомобил можеби повеќе нема да видиме.

Но, дали оправдува речиси двојно повисока цена во однос на стандардниот модел со шестцилиндарски мотор?

Цена што предизвикува шок

Во Германија, цената на овој модел изнесува 142.800 евра. За споредба, стандардната верзија со 3.0-литарски мотор стартува од 73.250 евра, додека основната верзија со 2.0-литарски мотор чини 63.250 евра.

Цената на "Final Edition" не е грешка – во Франција е уште поскапа, 144.000 евра, а купувачите мораат да освојат право на купување преку лотарија.

За тие пари, можете да купите многу други врвни автомобили. Дури и "BMW M4 Competition xDrive", целосно опремен, сè уште е поевтин од "Supra A90 Final Edition".

Слично важи и за "Lotus Emira", кој користи "Toyota V6" мотор, па дури и за "Porsche 911 Carrera T", кој во Германија стартува од 141.700 евра.

Ако пребарувате на "Mobile.de", ќе видите дека за оваа сума можете да купите "Ferrari 458" или "Audi R8" со атмосферски "V10" мотор.

Сепак, оваа верзија на "Supra" дури изгледа како „разумен“ избор во споредба со "Alpine A110 R Ultime", кој чини 330.000 евра, што го прави најскапиот сериски автомобил со четирицилиндричен мотор во историјата.

Што носи "Supra A90 Final Edition"?

Автомобилот има подобрена верзија на B58 моторот, сега со 435 коњски сили, во споредба со претходните 382 коњски сили.

Вртежниот момент е зголемен од 500 Nm на 570 Nm.

Toyota ги подобрила и механичките компоненти, вклучувајќи:

• Поголеми "Brembo" предни сопирачки

• "Akrapovič" титаниумски издувен систем

• Приспособливо "KW" потпирање

"Supra A90 Final Edition" доаѓа со различни димензии на тркалата напред и назад – 19 инчи напред, 20 инчи назад, со "Michelin Pilot Sport Cup 2" гуми, кои се 10% пошироки од претходните верзии.

Подобрена аеродинамика

Дополнително, аеродинамичниот пакет вклучува:

• Преден спојлер од карбонски влакна

• Голем заден спојлер

• Отвор за воздух на хаубата од карбон, кој може да се отстрани при возење на тркачка патека за подобро ладење

Овој модел се продава исклучиво со шестостепен мануелен менувач и презема одредени елементи од "Supra GT4', вклучувајќи алуминиумска задна оска.

Спортска внатрешност

Во внатрешноста има "Recaro" спортски седишта, црвени безбедносни појаси и "Alcantara" пресвлека.

Јапонците се во привилегирана позиција

Производството е еднакво поделено меѓу Европа и Јапонија, со 150 примероци по пазар.

Интересно е што во Јапонија, цената изнесува 15 милиони јени (околу 92.500 евра), што значи дека домашниот модел е значително поевтин од оној што се продава во Германија и Франција.

Исто како во Франција, јапонските купувачи мораат да учествуваат во лотарија за да добијат право на купување.