Во зависност од тоа кого ќе прашате, симнувањето на покривот од спортски автомобил или го подобрува или го расипува.

Кога станува збор за "Aston Martin Vanquish" со "V12 мотор", тешко е да се најде лоша страна, пишува "Motor1".

Без разлика дали љубителите на "GT" автомобилите ги преферираат со или без покрив, сега имаат можност да уживаат во моделот "V12 Vanquish" и како кабриолет.

Го претставуваме "Aston Martin Vanquish Volante" за 2026

Среќа, погонската единица останува непроменета во однос на купе-верзијата. Тоа значи 5.2-литарски "twin-turbo V12" со 835 коњски сили и 1000 Nm вртежен момент, кој ги придвижува задните тркала преку осумстепен "ZF" автоматски менувач.

Важно е да се напомене дека ова е најмоќниот сериски автомобил со мотор напред што може да се купи, без разлика дали е купе или кабриолет.

Воедно, тоа е и најбрзиот, со максимална брзина од 344 км/ч, идентична како кај верзијата со фиксен покрив.

Сепак, забрзувањето е малку послабо. "Vanquish Volante" достигнува 100 км/ч за 3,4 секунди, што е нијанса побавно од купето.

Причината за тоа е дополнителната тежина од 95 кг што ја носи кабриолетот. Сепак, "Aston Martin" смета дека ова зголемување на масата е „минимално“, а вкупната тежина на возилото во празен од се движи околу 1.950 кг.

Зајакната шасија и приспособено потпирање

Добрата вест е што конструкцијата е дополнително зајакната, па "Aston Martin" тврди дека цврстината на каросеријата е речиси идентична со купе-верзијата.

Деталите за тоа не се објавени, но се знае дека потпирањето е специјално приспособено за "Volante", во комбинација со "Bilstein DTX" амортизери.

За запирање се грижат карбон-керамички сопирачки со шестклипни клешти напред и четириклипни одзади, додека 21-инчните "Pirelli P Zero" гуми се идентични со оние кај купето.

Луксузен ентериер со допир на „отворено небо“

Како што се очекува, ентериерот останува ист, со два 10,25-инчни дигитални екрани – еден за возачот, а другиот за инфозабавниот систем.

Единствената разлика е копчето за спуштање на платнениот покрив, кој се собира за 14 секунди при брзини до 50 км/ч.

Подигањето на покривот трае малку подолго – 16 секунди. Сепак, со подигнат покрив нема да можете да уживате во звукот на опционалниот титаниумски издувен систем, па освен ако не врне, подобро е да го возите со отворен покрив.

Ексклузивност и ограничено производство

„Веќе 60 години, "Aston Martin Volante" моделите ја дефинираат уметноста на елегантното, спортско возење под отворено небо“, изјави извршниот директор на "Aston Martin", Адријан Холмарк.

"Aston Martin" сè уште не ја објавил официјалната цена, но јасно е дека ќе чини повеќе од купето, кое стартува од 434.000 долари.

Производството започнува во третиот квартал од 2025 година, а ќе бидат изработени помалку од 1.000 примероци годишно.