Клучот за успехот на ова јадење лежи во квалитетните состојки - ароматичниот доматен сос со месо, оризот кој задржува мала кремост и совршената комбинација на сирења кои даваат дополнителна полнота на вкус. Без разлика дали ќе го направите за посебна пригода или како заситен семеен оброк, ова ризото сигурно ќе ги освои сите на трпезата. Но, запомнете, на македонски се вика „ризото“, а не „рижото“, како што е за српски. Доаѓа од италијанскиот збор за ориз, односно riso (ризо).

Сосот ја ова јадење можете да го подготвите и однапред. Дури и ден однапред – на тој начин вкусовите уште подобро ќе се развијат. Само малку загрејте го пред да го измешате со оризот.

Експериментирајте со сирењето. Користете моцарела, па дури и добра гауда. Пекорино романо можете да го замените со пармезан.

За побогат вкус додадете малку бешамел. Доколку сакате уште покремаста текстура, помеѓу слоевите можете да додадете неколку лажици бешамел сос.

Потребни состојки:

за сосот:

• 2 лажици маслиново масло

• 1 среден кромид

• 5 чешниња лук

• 2-3 мали филети сардела (по желба)

• ½ лажичка мелена лута пипер (по желба)

• 900 гр мелено говедско месо

• 85 гр доматна паста

• 2 конзерви пелат

• Сол

• бибер

за оризот:

• 500 гр ориз

• 2 шолји грашок

• 230 гр моцарела*

• *¼ шолја свеж босилок

• 70 гр пекорино романо

*Оригиналниот рецепт вели скаморца, кравјо сирење од Јужна Италија, кое нема да го најдете тука. Самите Италијанци ова сирење во рецепти го заменуваат со моцарела.

Подготовка:

Загрејте го маслиновото масло во тава на средна топлина. Додадете ситно сечкан кромид и пржете додека не стане проѕирен. Додадете го лукот исечкан на коцки, филетите сардела и мелена пипер. Пржете уште една минута додека не замириса. Додадете го меленото говедско месо, скршете ги сите грутки со дрвена лажица. Пржете додека месото не порумени и не испари вишокот течност. Промешајте ја доматната паста и пржете минута или две за да се развијат вкусовите.

Додадете го пелатот, како и сол и бибер по вкус. Оставете го сосот да врие на тивок оган околу 30-40 минути, повремено мешајќи.

Во поголемо тенџере сварете го оризот во посолена вода, но сварете го 3-4 минути помалку отколку што пишува на пакувањето (треба да остане ал денте бидејќи потоа ќе се пече во рерна). Процедете го оризот и веднаш префрлете го во тавче.

Во тавчето измешајте го сварениот ориз, готовиот сос од месо и домати, грашокот, рендана моцарела и сечкан босилок. Добро измешајте за да се соединат сите состојки. Посипете со рендано пекорино романо. Се пече во загреана рерна на 200°C околу 20-25 минути, додека јадењето не добие златно кафеава кора. По желба, можете да го вклучите горниот грејач во последните 5 минути за сирењето да стане дополнително кафеаво и крцкаво. Се вади од рерна и се остава да отстои 5-10 минути пред да се послужи.

Ова јадење е вистински италијански оброк за душа – полн со вкус, сочен и заситен. Послужете го со свежа салата и чаша вино за целосен оброк.