Ограничен пристап до доверливи документи

Лајвли, која го тужи Балдони за несоодветно однесување за време на снимањето на The Ending With Us, како и за наводна одмазда кон неа, поднесе барање одредени докази и информации да бидат класифицирани како „само за очите на адвокатите“. Со оглед на тоа што двајцата учесници во случајот се јавни личности, постои ризик доверливите податоци да бидат злоупотребени.

Судијата Луис Лиман го прифати барањето, истакнувајќи дека материјалите што вклучуваат трговски тајни, безбедносни мерки, медицински податоци и лични информации за трети лица ќе бидат достапни исклучиво за адвокатите. Дури ни нивните клиенти нема да имаат пристап до овие податоци.

„Ризикот од обелоденување е значителен“, изјави судијата, предупредувајќи дека можното протекување на овие информации би довело до „озборувања и инсинуации“.

Приговор од страна на Балдони

Адвокатите на Џастин Балдони не се противеа на чувањето на овие материјали подалеку од медиумите и јавноста, туку на одредбата дека дури ни нивните клиенти не можат да ги видат. Ова, според нив, дополнително го усложнува судскиот процес и може да предизвика нови правни конфликти меѓу двете страни.

Сепак, судијата Лиман не му одобри на правниот тим на Лајвли сè што бараше. Тој го ограничи опсегот на заштитени информации, наведувајќи дека тајноста ќе се применува само на материјали што можат да предизвикаат „значителна деловна, финансиска или приватна штета“.

Најголемата холивудска тужба на деценијата

Случајот привлече големо внимание во јавноста, бидејќи вклучува тешки обвинувања. Лајвли тврди дека Балдони ја изложувал на навредливи и несоодветни коментари, ја принудил да учествува во компромитирачки сцени без нејзина согласност и подоцна организирал кампања за да ја дискредитира.

Од друга страна, Балдони возврати со противтужба вредна 400 милиони долари против Лајвли, нејзиниот сопруг Рајан Рејнолдс и нивниот ПР агент, обвинувајќи ги за клевета, изнуда и прекршување на договорните обврски.

Судењето за овој случај е закажано за 29 мај 2026 година и се очекува да биде едно од најголемите судски процеси во Холивуд во последната деценија.