Американскиот претседател Доналд Трамп има намера да обезбеди прекин на огнот во војната помеѓу Русија и Украина до Велигден, известува Блумберг, повикувајќи се на неименувани претставници од американската администрација.
Трамп претходно вети дека ќе ја заврши војната во Украина за 24 часа.
Откако ја освои претседателската позиција во САД, времето на неговата ветена акција е променето.
Трамп се надева на прекин на огнот до 20 април
Американската администрација информираше европски претставници дека се надева на договор за прекин на огнот до Велигден, кој оваа година паѓа на 20 април.
Планот на Трамп за брзо завршување на војната со Русија против Украина е амбициозен и "потенцијално неостварлив", изјави неименуван извор за Блумберг.
Повеќе е веројатно дека Трамп ќе успее да постигне прекин на огнот до крајот на годината, отколку до Велигден, додаде лице запознаено со плановите.
Во изминатата недела, САД презедоа неколку мерки кои ги загрижија европските и украинските власти.
Трамп разговараше со рускиот претседател Владимир Путин на 12 февруари, а потоа имаше посебен телефонски разговор со украинскиот претседател Володимир Зеленски.
Европјаните свикаа итен состанок поради потезите на САД
Специјалниот пратеник на американскиот претседател за Украина и Русија, Кит Келог, ги шокираше европските лидери кога изјави дека Европа нема да биде директно вклучена во мировните преговори помеѓу Русија и Украина.
Како резултат на тоа, Франција денеска организира вонреден самит, на кој европските лидери ќе дискутираат за стратегиите кон Русија и Украина, стравувајќи дека САД би можеле да ја исклучат ЕУ од преговарачкиот процес.
