Забавниот парк „Santa Claus Village“, кој привлекува повеќе од 600.000 луѓе годишно, особено е популарен за време на празничната сезона, пишува „Euronews“.

„Ова е како остварување на мојот сон. Навистина сум возбудена што сум овде“, вели полската туристка, Елзбиета Назарук.

Меѓутоа, некои локални жители не ја делат празничната радост, велејќи дека станбените згради сега се издаваат на туристи, повторувајќи ги веќе присутните поплаки за прекумерниот туризам.

Популацијата на градот се зголемува за десет пати во периодот пред Божиќ

Туризмот во Рованиеми цвета, а сопствениците на хотелите и рестораните, како и градските власти, профитираат од парите кои туристите ги трошат во градот. Сепак, не се сите среќни поради приливот на посетители, чијашто бројка е 10 пати поголема од населението во градот, секоја година во периодот пред Божиќ.

„Загрижени сме поради прекумерниот раст на туризмот. Туризмот порасна толку брзо што веќе не е под контрола“, рече 43-годишниот Анти Паканен, фотограф и член на мрежата за домување која организираше собир на улиците во септември.

Истото чувство веќе постои и во други популарни европски дестинации, вклучувајќи ги Барселона, Амстердам, Малага и Фиренца.

Сега се чини дека прекумерниот туризам се проширил на север, сè до рабовите на Арктичкиот круг.

Рованиеми броеше рекордни 1,2 милиони посетители во 2023 година, речиси 30 отсто повеќе отколку во 2022 година, откако закрепна од проблемите со пандемијата.

„Нордиското е тренд. Луѓето сакаат да патуваат во студените земји за да го видат снегот, да ја видат северната светлина и, се разбира, да го видат Дедо Мраз“, рече извршната директорка на „Visit Rovaniemi“ Сана Каркаинен додека стоеше во ледениот ресторан.

Повеќе летови, но нема доволно хотели

Годинава беа отворени 13 нови линии до аеродромот во Рованиеми кои носат патници од Женева, Берлин, Бордо и други. Повеќето туристи доаѓаат од европските земји како Франција, Германија и Велика Британија, но привлечноста на Рованиеми исто така се прошири.

Достапноста на хотелите оваа зима е оскудна, а Тина Мата, генералната менаџерка на хотелот „Original Sokos“ со 159 соби, очекува дека 2024 година ќе сруши повеќе рекорди.

Локалните критичари на масовниот туризам велат дека многу станбени згради во центарот на градот се користат како туристичко сместување за време на шпицот на сезоната, што значи дека тие повеќе не се достапни за станбена употреба. Тие велат дека ширењето на краткорочните изнајмувања ги зголемило цените, ги истиснало долгогодишните жители и го претворило центарот на градот во „проодна област за туристите“.

Инаку финскиот закон забранува професионални услуги за сместување во станбени згради, па активистите ги повикуваат властите да реагираат.

„Правилата мора подобро да се спроведуваат“, рече Паканен.

Меѓутоа не се согласуваат сите. Градоначалничката Ула-Кирсика Ваинио напоменува дека некои добро заработуваат од краткорочните изнајмувања.

Во секој случај, построгите прописи веројатно нема да бидат во сила за оваа зимска сезона, а и покрај негодувањата на локалните жители, масовниот туризам во Рованиеми веројатно ќе расте и повеќе во 2025 година – бидејќи посетителите сакаат да ја искусат уникатната атмосфера на северот, особено за време на празничната сезона.

„Сега е време на Божиќ и би сакале да ја видиме северната светлина. Рованиеми изгледа како добро место“, вели Џој, посетител од Бангкок.