Македонците ретко го јадат, а не знаат колку важни витамини содржи: Есенско овошје кое го зајакнува имунитетот и го подобрува видот

Точка

19/11/2026

21:19

855

Големина на фонт

а а а

Портокаловите плодови на какито, познато и како јапонско јаболко, деновиве можат да се најдат на пазарите и во продавниците. Покрај слаткиот вкус, ова овошје содржи многу растителни влакна, витамини А и Ц, како и антиоксиданти. Сепак, постојат неколку правила што треба да се имаат предвид при неговото консумирање.

Какито созрева во доцна есен, кога сезоната на повеќето други видови овошје веќе е завршена. Според Американското здружение за срце (АХА), најзастапено е од септември до декември.

Тоа е одличен избор за сите на кои им здодеале јаболката, портокалите и бананите, бидејќи совршено се вклопува и во слатки и во солени јадења.


Што сè содржи еден плод каки?

Според податоците што ги наведува порталот „Healthline“, едно јапонско јаболко тешко околу 168 грама содржи приближно 118 калории, 31 грам јаглехидрати и шест грама растителни влакна, додека речиси воопшто не содржи масти. Во него се наоѓаат и витамини Б1 и Б2, фолна киселина, магнезиум и фосфор.

Особено се издвојува витаминот А. Според податоците на Американското здружение за срце, еден плод обезбедува околу 55 отсто од препорачаниот дневен внес на овој витамин, како и повеќе од 20 отсто од дневните потреби за витамин Ц.


Карактеристичната портокалова боја потекнува од бета-каротенот, пигмент што организмот го претвора во витамин А, кој е важен за зачувување на видот и нормалното функционирање на имунолошкиот систем.

Експертите од Американското здружение за срце советуваат јапонското јаболко да се консумира со мала количина здрави масти, на пример, со ореви или маслиново масло во салата. Причината е тоа што каротеноидите, меѓу кои спаѓа и бета-каротенот, подобро се апсорбираат кога се внесуваат заедно со масти.

Растителните влакна го подобруваат варењето и го регулираат нивото на шеќер во крвта

Јапонското јаболко содржи релативно малку калории, а многу растителни влакна, поради што може подолго да го одржува чувството на ситост и да биде корисен дел од урамнотежената исхрана.

Според порталот „WebMD“, растворливите растителни влакна од ова овошје го забавуваат варењето на јаглехидратите и на тој начин можат да придонесат за спречување нагли скокови на нивото на шеќер во крвта.


Витаминот Ц, од друга страна, придонесува за нормално функционирање на имунолошкиот систем и учествува во заштитата на клетките од оксидативен стрес.

Овој витамин е важен и за нормалното создавање колаген, кој има улога во зачувувањето на здравјето на крвните садови.

Два вида јапонски јаболка и два начини на консумирање

На пазарот најчесто можат да се најдат два вида јапонски јаболка, кои се разликуваат по вкусот и текстурата, но и по тоа кога се подготвени за јадење.

Сортите како Фују (Fuyu) немаат горчлив и трпкав вкус, па можат да се јадат и додека се сè уште цврсти, слично како обичните јаболка. Од друга страна, сортите како Хачија (Hachiya) содржат многу танини и треба да се консумираат дури откако целосно ќе омекнат. Ако се јадат додека се незрели, можат да остават непријатно, трпкаво чувство во устата.


Зошто не треба да се претерува, особено со незрелите плодови?

Танините во јапонското јаболко имаат и своја негативна страна. Според медицинскиот прирачник „MSD“, прекумерното консумирање на ова овошје може да доведе до создавање безоари, односно цврсти наслаги од несварена храна во желудникот.

Еден од танините во јапонското јаболко, наречен шибуол, при контакт со желудочната киселина може да се стврдне и да придонесе за создавање вакви наслаги. Во одредени случаи, потребно е тие да се отстранат со ендоскопска процедура или хируршка интервенција.


Сепак, ваквите компликации се ретки и најчесто се јавуваат кај лица кои имаат забавено празнење на желудникот или претходно биле подложени на операција на желудникот.

Во еден опишан случај, кај 87-годишна жена дошло до затнување на цревата откако проголтала големо сушено, трпкаво јапонско јаболко без доволно да го изџвака.

За повеќето луѓе доволно е да избираат зрели плодови, добро да ги џвакаат и да не претеруваат со количината.

Јапонското јаболко може да се јаде свежо, да се додава во салати, смутија и колачи, а може и да се суши.