Крај на фрлањето парички во фонтаната Треви? Италија најави неверојатна промена

Точка

17/11/2026

19:53

131

Големина на фонт

а а а

Традиционалното фрлање парички во римската фонтана Треви би можело да добие и дигитална алтернатива, бидејќи се разгледува можноста за воведување бесконтактно плаќање преку ПОС-терминали, со што посетителите би можеле да дадат прилог и без готовина, пренесе „Република“.

Како што наведува италијанскиот весник, идејата е со користење електронски систем да се олесни давањето прилози, да се намали употребата на готовина и да се овозможи потранспарентно управување со собраните средства.

Фонтаната Треви, која секојдневно ја посетуваат илјадници туристи е еден од најпознатите симболи на Рим, а фрлањето парички во нејзината вода претставува долгогодишна традиција поврзана со верувањето дека оние кои ќе го направат тоа еден ден повторно ќе се вратат во италијанската престолнина.


Воведувањето дигитално плаќање би можело да го олесни собирањето прилози, но се поставува прашањето дали таквата промена би влијаела врз традиционалниот обичај, кој станал дел од туристичкиот идентитет на Рим.

Како едно од можните решенија се споменува комбинирањето на традиционалното фрлање парички со електронското плаќање, со цел посетителите да можат да изберат дали ќе го зачуваат обичајот или ќе ги користат современите технологии.

Пад на приходите и нови правила

Во текот на првите девет месеци од 2026 година, туристите фрлиле околу 174.000 евра помалку во римската фонтана Треви во споредба со истиот период минатата година, откако биле воведени влезници за пристап до просторот околу фонтаната, објави радиото „Рома Капитале“.


Според податоците на католичката хуманитарна организација „Каритас“, од јануари до септември оваа година од фонтаната биле собрани 1,24 милиони евра, додека во истиот период во 2025 година биле собрани 1,42 милиони евра.

Намалена е и вкупната тежина на собраните монети за околу 10 до 15 отсто, на 22.740,55 килограми.

Падот на приходите се припишува на новите правила за пристап до знаменитоста, воведени во февруари, според кои туристите мора да платат два евра за да се спуштат до базенот на фонтаната.

Градските власти ја вовеле наплатата со цел да го регулираат бројот на посетители и да го заштитат споменикот, а собраните средства се наменети за одржување на фонтаната и обезбедување бесплатни влезници за градските музеи за жителите на Рим.


Поради поставените огради и ограничениот пристап, дел од туристите сега ја разгледуваат фонтаната од далечина, без традиционалното фрлање парички во водата.

Парите што посетителите ги оставаат во фонтаната се наменети за социјални програми и помош на ранливите категории граѓани. Собирањето на монетите се врши во присуство на полициски службеници.

Од 2022 до 2025 година, „Каритас“ насочил околу седум милиони евра, собрани од фонтаната, за помош на луѓето на кои им е потребна.

Фонтаната Треви е изградена меѓу 1732 и 1762 година, според проектот на архитектот Никола Салви. Централната фигура во композицијата е Океан, најстариот син на Уран (Небото) и Геја (Земјата) и еден од 12-те титани, додека водата во базенот пристигнува преку аквадукт изграден уште во 19 година пред нашата ера.