Многу мажи се водат по едно непишано правило: додека можат да стојат на нозе, здрави се како дрен. Секоја необична болка, чувство на притисок што не поминува или нова грутка најлесно е да се занемари со познатото „само се преморив“ или „ќе помине само од себе“. И навистина, во многу случаи станува збор за нешто минливо.

Проблемот настанува кога телото испраќа предупредувачки сигнали, а гордоста и одложувањето на прегледот одземаат драгоцено време. Навремената реакција може да ја направи разликата меѓу едноставно лекување и сериозна борба со болеста.

Ако препознаете некој од овие пет симптоми, не барајте изговори. Некои бараат лекарски преглед, а други итна помош.

1. Стегање, притисок или болка во градите

Причината може да биде киселина по обилен ручек или истегнат мускул по вежбање, но болката во градите не треба да се занемарува.

Ако ненадејно почувствувате болка, притисок или стегање во градите што трае повеќе од неколку минути или се повлекува па повторно се јавува, веднаш јавете се на 194 или 112. Особено загрижувачки знаци се студена пот, отежнато дишење, мачнина или болка што се шири кон вилицата, вратот, грбот или едната или двете раце. 

2. Нагло зголемување или намалување на тежината „од ведро небо“

Нормално е телесната тежина да варира за килограм или два по викендот или по промени во исхраната. Но ако облеката одеднаш ви стане преголема или почнете да се дебелеете без да го промените начинот на исхрана или нивото на физичка активност, причината треба да се провери. Наглото слабеење или дебелеење без очигледно објаснување може да биде знак за нарушување на тироидната жлезда, недијагностициран дијабетес или друг метаболички проблем.

3. Крв во столицата и промени во празнењето на цревата

Првата реакција на многу мажи кога ќе забележат крв во тоалетната школка е: „Сигурно се хемороиди“. Можно е да се во право, но тоа треба да го утврди лекар, а не пребарување на „Google“ во два часот по полноќ.

Повторливото крвавење, црната столица, ненадејната појава на запек што се менува со дијареја и придружните болки во стомакот може да укажуваат на посериозно заболување на дигестивниот тракт, вклучително и на рак на дебелото црево или ректумот. Колку порано се открие болеста, толку се поголеми изгледите за успешно лекување.

4. Грутка или промена на тестисот

Мажите често го одложуваат уролошкиот преглед од срам или затоа што мислат дека „ако не боли, не е опасно“. Токму тука е стапицата. Ракот на тестисите најчесто ги погодува помладите мажи, особено оние на возраст од 15 до 35 години, и може да се појави како безболна грутка, оток, промена во цврстината на тестисот или чувство на тежина во скротумот. Нова грутка или забележлива промена во големината или обликот на тестисот е причина за преглед без одложување. Лекарот ќе процени дали е потребен ултразвук. NHS

5. Ноќно станување и ослабен млаз при мокрење

Ако ви треба повеќе време да почнете да мокрите, млазот е значително послаб, се будите по неколку пати во текот на ноќта или имате чувство дека мочниот меур никогаш не се празни целосно, закажете преглед. Овие симптоми често се поврзани со бенигно зголемување на простатата или со воспаление, но не треба да се игнорираат.

Ракот на простатата во рана фаза најчесто не предизвикува симптоми. Затоа е корисно со лекар да разговарате за придобивките и ризиците од раното тестирање, обично од 50-годишна возраст, а од 45 години ако имате семејна историја на болеста. 

Целта не е да трчате во лабораторија по секое кивање. Но кога ќе забележите промена што не поминува, се повторува или ви го нарушува секојдневието, закажете преглед. Половина час кај лекар е попаметен избор отколку да чекате проблемот да се реши сам од себе.