Некогаш важна станица на популарната хипи-рута, Индија веќе со децении е една од значајните светски туристички дестинации. Посетителите ги привлекува со богатиот животински свет, традиционалните практики насочени кон здравјето и благосостојбата, како и со знаменитостите, меѓу кои се издвојува величествениот Таџ Махал.

Меѓутоа, во последните години се бележи пад на бројот на странски туристи. Во текот на 2025 година, Индија ја посетиле 9,15 милиони странски туристи, што е за осум отсто помалку во споредба со рекордните 10,93 милиони во 2019 година.

Индија се надева дека ќе го промени овој тренд и си поставила амбициозна цел – до 2047 година, кога ќе одбележи 100 години од стекнувањето независност, сака да привлекува дури 100 милиони туристи годишно.

Прогласувањето за дестинација на годината за 2027 година, според изборот на списанието „Travel + Leisure“, секако би можело да придонесе за остварување на оваа цел, пренесе „Јуроњуз“.

Ова признание се доделува секоја година од 2014 година, а меѓу неодамнешните добитници беа Бразил во 2026, Тајланд во 2025 и Костарика во 2024 година.

Главната уредничка на списанието „Travel + Leisure“, Џеки Гифорд, пишувајќи за оваа јужноазиска земја, ја истакнала својата посебна поврзаност со Индија.

„Некои дестинации нѝ го допираат срцето повеќе од други. За мене, едно од таквите места е Индија.

Првпат ја посетив кога имав три години и останав воодушевена од боите, мекиот наан-леб со путер, нежната свила на саријата, сообраќајниот хаос и топлината што се чувствува во секој разговор. Таа земја едноставно ви се вовлекува под кожа“, напишала Гифорд.

Кои места да ги посетите во Индија?

Индија се простира на приближно 3,29 милиони квадратни километри и е поделена на 28 сојузни држави и осум сојузни територии. Поради нејзината големина и разновидност, не е едноставно да се одлучи од каде да се започне патувањето.

Доколку сте љубител на градски патувања, списанието „Travel + Leisure“ го препорачува Удаипур, познат и како индиската „Венеција на Истокот“.

Градот е опкружен со седум езера, а посетителите можат да истражуваат знаменитости како што се Градската палата и Монсунската палата. Можно е дури и да се престојува во вистинска палата – хотелот „Taj Lake Palace“ редовно се наоѓа на листите на најдобрите хотели во светот.

Друга можност е посета на Њу Делхи, каде што се наоѓаат знаменитости како што се минарето Кутуб Минар и гробницата на Хумајун. Главниот град може да послужи и како почетна точка за патување до Агра, каде што се наоѓа славниот Таџ Махал.

На листата на препорачани дестинации се најде и архипелагот Лакшадвип, група острови од кои само неколку се отворени за туристи секоја година.

Тука е и сојузната држава Мадја Прадеш, позната по најголемата популација на тигри во Индија и спектакуларните храмови, како и регионот Четинад, кој се издвојува по својот препознатлив архитектонски стил.

Фото: Time out, AP, Lonely Planet