Белоруската тенисерка Арина Сабаленка никого не остава рамнодушен и се чини дека во моментов е најголемата тениска ѕвезда. Делумно тоа се должи на фактот што долго време беше прва на ранг-листата на WTA, а од друга страна и на тоа што сака да биде во центарот на вниманието на медиумите и надвор од теренот, што неизбежно знае да им пречи на некои луѓе.

Така, Сабаленка повторно беше „главна“ во промотивното видео за преносот на завршниот турнир на WTA од Индијан Велс. Таа позираше пред камерите и испраќаше бакнежи, поради што непотребно се најде на мета на навредлив коментар од еден новинар на телевизијата „beIN Sports“.

Микрофонот останал вклучен, па можело да се слушне како Матје Солие вели: „Гледајте, гледајте, гледајте колку е ужасна“.

Не поминало многу време пред овој непристоен коментар да се прошири на социјалните мрежи, а бурно реагирал и Флоран Узу, еден од раководителите на споменатата телевизија, кој се извинил во име на својот новинар:

„Жалам за коментарите изречени во живо за време на вечерашниот пренос на завршниот турнир на WTA и најостро ги осудувам. Таквите коментари не ги одразуваат вредностите на нашата телевизија. Уште еднаш истакнувам дека сме посветени на тоа кон сите спортисти и соработници во нашите емисии да се однесуваме со почит“.

По овој повод Арина не се огласила, веројатно и затоа што сака целосно да се фокусира на завршниот турнир, бидејќи зад неа не е особено успешна тениска сезона, па сака да го поправи впечатокот на самиот крај.

Популарна на социјалните мрежи

Белоруската тенисерка има 5,7 милиони следбеници на Инстаграм, а во текот на 2025 година заработила околу 25 милиони евра од награди и спонзорски договори. Поради тоа што имала сè повеќе „нетениски обврски“, вклучително и неколку модни ревии, многумина се склони да поверуваат дека го изгубила фокусот на тенисот.

Сепак, ваквите забелешки особено ја лутат, а Сабаленка уверува дека тренира подеднакво како и порано и дека социјалните мрежи за неа се само начин да се „издува“.