Меѓутоа, не планирал да го реставрира, ниту да направи украс за дворот од него. Наместо тоа, одлучил да го закопа под земја и да го претвори во простор за забава што истовремено може да послужи и како засолниште во случај на војна.

Инспириран од култен филм

Трупот на „Boeing“, тежок три тони, кој некогаш ѝ припаѓал на компанијата „Bmibaby“, е најновиот додаток на амбициозниот подземен комплекс што инженерот Дејв Билингс (45) со години го гради под својот имот во местото Хилтон, во англиската грофовија Дарбишир.

Инспириран од култниот филм за Втората светска војна „Големото бегство“, Дејв досега вложил околу 60.000 евра во овој необичен проект. Подземниот комплекс опфаќа лавиринт од тунели, тајни простории и скриени влезови.

Надреални снимки прикажуваат група негови соработници како со помош на механизација го спуштаат огромниот труп на авионот во земјата, пренесува „Daily Mail“.

Дејв проценува дека подземното засолниште би можело да му обезбеди на неговото семејство услови за живот дури три месеци во случај да избувне Трета светска војна.

За бункерот да биде подготвен за такво сценарио, планира да постави шахта за лифт, скриена во традиционална црвена телефонска говорница, преку која посетителите би се спуштале до централниот дел на засолништето.

„Се прашуваше зошто трошам пари“

Инженерот вели дека неговиот осумгодишен син Оливер, кој е опседнат со авиони, веднаш ја прифатил необичната идеја, додека сопругата Бет морал нешто подолго да ја убедува за да разбере што сака да постигне.

„Се прашуваше зошто трошам пари на стар авион и ми велеше дека тоа е само куп железо, но сега полека го менува мислењето. Пред сè, тоа е нешто забавно што го имаме, место каде што можеме да правиме забави и да се опуштаме, но би можело да се претвори и во засолниште“, изјавил Дејв.

Според него, следната фаза од работите подразбира трупот на авионот да биде прекриен со слој бетон и земја дебел околу 75 сантиметри.

„Ќе имаме струја и вода, а одозгора поставуваме соларни панели. Авионскиот тоалет ќе биде преуреден за да може нормално да се користи и ќе биде поврзан со септичка јама. Конструкцијата ќе има и сопствен систем за вентилација. Во зависност од количеството храна во резервите, би можеле долго да живееме независно од надворешни извори на снабдување, ако има потреба за тоа“, додал тој.

Иако бункерот ќе има сè што е потребно за преживување во вонредни околности, Дејв инсистира дека неговата основна намена сепак е забавата.

Рок што мора да го испочитува

„Да бев навистина човек што се подготвува за крајот на светот, ќе оставев сè друго настрана и ќе му се посветев исклучиво на овој проект. Вакви работи правам затоа што се интересни. Уживам во тоа. Но ова е нешто што истовремено е интересно и има конкретна цел – може да биде и функционално. Ако ситуацијата ескалира и засолништето навистина стане потребно, можам да ги забрзам работите, но не верувам дека некој ќе ги бомбардира долините на Дарбишир“, изјавил Дејв.

Според неговите процени, за продолжување на работите ќе бидат потребни уште околу 9.500 евра за бетон, 2.500 за арматурна мрежа и околу 2.000 за изолација. Дури потоа авионот ќе биде целосно затрупан и обезбеден под земја.

Во трошоците сè уште не се пресметани храната, пијалаците и пивото со кои планира да го наполни необичниот бункер.

„Бет рече дека сè мора да биде готово пред нашата десетта годишнина од бракот, така што имам многу строг рок што мора да го испочитувам“, заклучил Дејв.