Кога температурите ќе се намалат, сушарата со мокри алишта често завршува во дневната или спалната соба. Тоа може да ја зголеми влажноста на воздухот, да предизвика замаглување на прозорците и појава на непријатни мириси, а во некои случаи и да доведе до создавање мувла. Во Норвешка, земја со долги и студени зими, големо внимание се посветува на проветрувањето и контролата на влажноста.

Клучна грешка при проветрувањето

Кога ќе залади, повеќето луѓе се обидуваат да ја зачуваат топлината во домот и што поретко ги отвораат прозорците. Некои, пак, ги оставаат подотворени со часови, сметајќи дека на тој начин ќе обезбедат доволно свеж воздух без голема загуба на топлина.

Но, наместо прозорците подолго време да се оставаат отворени на кип, се препорачува нивно целосно отворање на пократок период. На тој начин воздухот во просторијата побрзо се разменува, додека ѕидовите и мебелот не успеваат да се изладат.

Се препорачува прозорците да се отворат целосно во времетраење од околу пет до десет минути, зависно од надворешната температура, ветерот и големината на просторијата. Доколку временските услови го дозволуваат тоа, краткотрајното создавање провев може дополнително да ја забрза размената на воздухот.

Потоа прозорците треба да се затворат и да се остави просторијата повторно да се загрее. Постапката може да се повтори неколкупати во текот на денот, особено ако во просторијата се сушат алишта.

Како студениот воздух помага при сушењето?

Иако изгледа нелогично, студениот зимски воздух може да помогне во отстранувањето на вишокот влага. Причината е едноставна: мократа облека за време на сушењето испушта вода, која испарува во околниот воздух. Ако просторијата не се проветрува, нивото на влажност се зголемува, па преостанатата вода од ткаенината побавно испарува.

Студениот надворешен воздух, дури и кога има висока релативна влажност, често содржи помалку водена пареа од топлиот воздух во станот. Кога ќе навлезе во просторијата и ќе се загрее, неговата релативна влажност се намалува, па може да преземе дополнителна влага од облеката. На овој начин се овозможува поефикасно сушење на алиштата, со помал ризик од кондензација на прозорците и ѕидовите.

Положбата на сушарата и распоредот на облеката

Правилното проветрување не е единствениот начин за забрзување на сушењето. Важна улога има и распоредот на алиштата на сушарата. Ако закачите премногу облека и парчињата се допираат меѓусебно, воздухот потешко ќе циркулира. Затоа е важно да се остави доволно простор меѓу парчињата облека. Подебелите ткаенини треба да се рашират колку што е можно повеќе, додека кошулите и маиците може да се сушат на закачалки.

Сушарата не треба да се поставува непосредно до студени надворешни ѕидови, бидејќи таму влагата полесно се кондензира. Исто така, не се препорачува мократа облека да се поставува директно врз радијаторите. На тој начин може да се попречи загревањето на просторијата, а кај некои грејни уреди се зголемува и ризикот од прегревање.

Корисен чекор е и користењето ефикасна центрифуга во машината за перење, која отстранува поголем дел од водата од ткаенината пред сушењето.

Навика важна за целиот дом

Една од најчестите грешки е речиси целосното избегнување на проветрувањето поради страв дека станот ќе се излади. Сепак, влагата не настанува само од мокрите алишта, туку се ослободува и при готвење, туширање, па дури и при дишење. Ако таа влага не се отстранува со редовно проветрување, може да создаде поволни услови за развој на мувла.

Токму затоа краткотрајното, но интензивно проветрување е клучна навика што помага облеката побрзо да се исуши, без непотребно натрупување влага во домот.