Во каталонското гратче Тороела де Монтгри беше претставена новата колекција на „каганер“ фигурички, божиќни фигурички што во божиќните јасли клечат и вршат нужда, а оваа година меѓу нив се Шакира, Доналд Трамп и Ерлинг Халанд.
„Каганер“ е една од најнеобичните божиќни традиции во Европа. Името на фигуричката на каталонски јазик буквално значи „оној што врши нужда“, а Каталонците секоја година ја поставуваат во божиќните јасли, покрај Исус, Марија, Јосиф, овчарите и тројцата мудреци.
Селанец со црвена капа
„Каганер“ се појавил во каталонските божиќни јасли кон крајот на 17 или почетокот на 18 век, а и пред тоа бил прикажуван на керамички плочки со сцени од различни занаети.
Класичниот „каганер“ е селанец со баретина, традиционална каталонска црвена капа, кој клечи со спуштени панталони. Често пуши луле или пура, а понекогаш чита весник. Зад него понекогаш се наоѓа и мало прасе.
Слични фигурички постојат и во шпанската покраина Мурсија, Португалија и Неапол.
Симбол на плодност и среќа
Што точно претставува „каганер“, сè уште не е сосема јасно. Најчестото објаснување е дека станува збор за симбол на плодноста од паганските времиња, кога изметот ја збогатувал земјата за подобар род. Каталонскиот историчар Дани Кортихо за порталот „Catalan News“ вели дека без „каганер“ во божиќните јасли нема среќа во наредната година. Други во фигуричката гледаат шега или исмевање на власта.
Во некои семејства децата пред Божиќ го бараат „каганер“ низ куќата, а возрасните секој ден го преместуваат на друго место за да ја „наѓубри“ целата земја.
Од фудбалери до претседатели
Во последните години производителите секоја есен претставуваат фигурички со ликовите на познати личности: политичари, фудбалери, актери, пејачи, па дури и папи. Фигуричките станаа и колекционерски предмети, а добро се продаваат на традиционалниот божиќен саем „Santa Llúcia“, пред катедралата во Барселона.
Како што може да се види на фотографиите на агенцијата EPA, и годинашната колекција вклучува политичари. Покрај американскиот претседател Доналд Трамп, своја фигуричка доби и претседателката на Мексико, Клаудија Шејнбаум.
Не се заборавени ниту фудбалерите. Меѓу фигуричките се Ламин Јамал и Марк Кукуреља во дресот на Барселона, Родри во бел дрес и Ерлинг Халанд во дресот на Манчестер Сити.
Од музичкиот свет, тука се Шакира, Росалија, Ед Ширан со гитара и Бруно Марс, како и шпанскиот магионичар Маго Поп. Колекцијата вклучува и фигуричка на инфлуенсерка која се фотографира покрај светилка, како и класични „каганер“ фигурички во каталонска народна носија.
