Холи, која на социјалните мрежи главно споделува содржини за семејниот живот и готвењето, се снимила пред судот непосредно откако разводот станал официјален.

„Здраво, штотуку се разведовме. Ова е толку возбудливо... И сега сум слободна“, изјавила таа, покажувајќи ги документите со кои било потврдено дека нивниот брак е завршен.

Таа раскажала дека судијата во текот на постапката им поставил неколку прашања, меѓу кои и прашања поврзани со замрзнатите ембриони. По тоа, потврдил дека нивниот брак е завршен.

Открила и дека таа го одвезла Џејмс до судот бидејќи тој бил загрижен дали ќе најде место за паркирање во центарот на градот. Додека се враќале кон автомобилот, му упатила и неколку шеговити забелешки.

„Оттука, сè ќе ти тргне надолу. Многу пропушташ. Јас сум најдобрата. Најдобрата што некогаш си ја имал“, му порачала таа.

По завршувањето на судската постапка, поранешните сопружници отишле на ручек во ресторанот „Olive Garden“, кој го посетувале и на почетокот на нивната врска. Холи се пошегувала дека можеби токму на тоа место ја изгубиле некогашната блискост. Заедничкото време го продолжиле со шопинг и разгледување божиќни украси.

Претходно зборувала за проблемите што довеле до разводот

Иако на видеото изгледала многу расположено, Холи во мај на Јутјуб зборувала за тоа колку тешко ѝ паднал крајот на бракот. Тогаш признала дека ѝ е скршено срцето и дека не очекувала нивната врска да заврши со развод. Тврдела и дека поголемиот дел од заедничките обврски морала да ги презема врз себе.

„Мислам дека ова видео добро ја прикажува состојбата меѓу нас во последно време. Џејмс седи настрана и не учествува, додека јас морам сè да планирам и да ја завршувам целата работа“, изјавила тогаш.

Таа се осврнала и на нивната четиригодишна борба со неплодноста, во текот на која поминала низ десетици медицински интервенции и потрошила илјадници долари обидувајќи се да добие дете. Според нејзините зборови, Џејмс на крајот заклучил дека сака живот со помалку одговорности.

Холи од претходните врски има две деца, синот Шепард и ќерката Сејти, кои ги добила со помош на донор на сперма пред бракот со Џејмс.

Нејзината објава предизвика бројни коментари, а дел од корисниците ја критикуваа поради начинот на кој пред камерите го одбележала разводот, особено затоа што Џејмс во текот на видеото изгледал значително повоздржано.

„Последниот дел, кога си замина и мавна без да се сврти, ми кажува сè што треба да знам“, „Жал ми е за него од толку многу аспекти. Човекот заслужува многу подобро од ова“, беа дел од коментарите.

Некои сметаа дека Џејмс едноставно сака да продолжи понатаму без дополнително внимание од јавноста.

„Човекот само сака да си замине, но таа мораше да направи содржина од целата ситуација. Се спаси“, гласеше еден од коментарите.

Сепак, имаше и такви што застанаа во одбрана на Холи, наведувајќи дека нејзиното однесување не може да се набљудува без познавање на околностите што довеле до разводот.

„По години нејзина поддршка и заедничка одлука за проширување на семејството, тој заклучи дека му е доста. Не сакаше никаква одговорност и стави крај на сето тоа. Таа се однесуваше исклучиво љубезно кон него откако тој ја донесе таа одлука. Да бев на нејзино место, ќе му кажев сам да си најде превоз до судот, така што таа е подобра личност од мене“, напишала една следбеничка.

Друга корисничка истакнала колку може да биде исцрпувачко преземањето на најголемиот дел од обврските во домаќинството.

„Луѓето не сфаќаат колку е исцрпувачки да се води целото домаќинство и да се има партнер кој се однесува како трето дете. Таа има целосно право да го прослави повторното освојување на сопствениот живот, особено поради своите деца“, навела таа.

Исто така, Холи во септември открила дека, и покрај разводот, нема намера да се откаже од плановите да добие уште едно дете преку сурогат-мајчинство, овој пат како самохрана мајка. Објаснила дека замрзнатите ембриони биле создадени од нејзините јајце-клетки и спермата на истиот донор со чија помош ги добила првите две деца.

Иако Џејмс нема биолошка поврзаност со ембрионите, имал законски права во врска со нив бидејќи биле создадени за време на нивниот брак. По завршувањето на судската постапка, поранешните сопружници го потврдиле договорот според кој Холи го задржува правото да ги користи замрзнатите ембриони.