Обично, луѓето кои живеат во земји што не се директно загрозени од овие промени, не размислуваат многу за последиците што може да ги предизвика глобалното затоплување, а со тоа и зголемувањето на нивото на морето.

Звучи неверојатно, но за помалку од пет години би можело да се случи одредени градови во светот едноставно да исчезнат под вода.

Врз основа на извештајот за климатските промени, изготвен од Меѓувладиниот панел за климатски промени (IPCC) во 2021 година, организацијата „Клајмат сентрал“ изработила мапи за да ги означи локациите во светот што би можеле да бидат директно и негативно погодени од зголемувањето на нивото на морето до 2030 година, пренесе „Тајм аут“.

Два европски градови

Иако на оваа интересна листа се наоѓаат градови од различни делови на светот, дури два од нив се во Европа. И двата градови се популарни туристички дестинации.

За среќа, многу земји се свесни за последиците што може да ги предизвика зголемувањето на нивото на морето, па затоа континуирано инвестираат во заштита на особено загрозените подрачја.

Една од тие земји е и Холандија, со оглед на тоа што на листата на градови кои би можеле да се најдат под вода во наредните години се наоѓа и Амстердам. Но, тоа не е единствениот холандски град што би можел да биде загрозен, бидејќи и Хаг и Ротердам се наоѓаат на локации каде што би можеле да ги почувствуваат негативните последици од климатските промени, пред сè преку зголемувањето на нивото на морето.

Очекувано, вториот европски град што се смета за загрозен е Венеција. Но, тоа не е единствената закана со која се соочува градот испреплетен со канали, бидејќи е утврдено дека и самиот град постепено тоне.

Иако станува збор за само два милиметри годишно, Венеција сепак тоне, што значи дека, практично гледано е загрозена од две страни.

Иако системот за заштита од поплави во оваа позната туристичка дестинација добро функционира, се проценува дека неговото одржување ќе станува сè поскапо.

Кои други градови се загрозени?

Покрај споменатите два европски градови, во светот постојат уште многу градови кои се сметаат за особено загрозени. Некои од нив се атрактивни туристички дестинации, додека други не се толку популарни меѓу туристите.

Меѓу нив се ирачкиот град Басра, американскиот Њу Орлеанс, како и Хо Ши Мин во Виетнам. На оваа листа се наоѓаат и Бангкок во Тајланд, Калкута во Индија, Џорџтаун во Гвајана и Савана, САД.

Главниот град на Малдивите, Мале, можеби не е толку загрозен колку неговата околина. Сепак, оваа островска земја, опкружена со водите на Индискиот Океан, веќе со години успешно се бори против заканата од зголемувањето на нивото на морето.