Проблемот ескалирал до тој степен што сè почесто се зборува за „дизнификација“ на селото, при што постојаниот метеж и несоодветното однесување на туристите ја уништуваат токму онаа автентичност поради која посетителите доаѓаат, пишува „Дејли мејл“.

Живот зад завесите

Жителите на најпознатата улица во селото, Арлингтон Роу, се особено изложени на најлошите страни на туризмот. Ричард Пајл, 80-годишен жител на оваа улица, ги опишал секојдневните ситуации во кои туристите му ѕиркаат низ прозорците, влегуваат на неговиот приватен имот, па дури и се обидуваат да ја отворат влезната врата.

На вратата поставил и натпис со кој ги замолува да не го прават тоа.

„Ми влегуваат во градината и организираат пикници на тревникот. Селото е уништено од мај до октомври“, изјавил Пајл, додавајќи дека ситуацијата станала неодржлива.

Сообраќаен хаос и непочитување

Покрај нарушувањето на приватноста, огромен проблем претставуваат и сообраќајниот хаос и според зборовите на мештаните, недостатокот на почит. Десетици туристички автобуси секојдневно пристигнуваат во тесните селски улици, често блокирајќи го сообраќајот и паркирајќи на недозволени места, иако надвор од центарот на селото постои паркинг за автобуси.

„Во лето овде е вистинска зоолошка градина. Автобусите се вистински кошмар, а почит воопшто нема“, рекол 74-годишниот Ричард Сперџ.

Друг жител, Дејвид Вилијамс, смета дека селото е „жртвувано“ поради профитот од туризмот.

„Се чувствуваме како да живееме во забавен парк, а не во вистинско населено место“, изјавил тој.

Село кое „се сака до смрт“

Авторката Викторија Самерли, која напишала книга за Бибери, ја опишала ситуацијата како феномен во кој селото „се сака до смрт“. Таа објаснила дека станува збор за еден вид „дизнификација“, при што местото се претвора во карикатура на самото себе.

„Иронијата е во тоа што туристите доаѓаат во потрага по автентичност, а токму нивното масовно присуство ја уништува таа автентичност“, истакнала Самерли.

Овој парадокс е видлив насекаде, од метежот што го оневозможува нормалниот живот до фактот дека од мештаните се очекува да ја одржуваат совршената слика како од разгледница, без оглед на цената што ја плаќаат за тоа.

Критики на сметка на локалните власти

Многу жители сметаат дека локалните власти не направиле доволно за да ги заштитат. Тие го критикуваат советот на округот Котсволдс бидејќи не спроведува поефикасни мерки за управување со туризмот. Иако на некои критични места се поставени двојни жолти линии со кои се забранува паркирање, мештаните велат дека правилата ретко се спроведуваат.

Возачите на автобусите често ги оставаат патниците во самиот центар на селото за да им го скратат пешачењето, што предизвикува застој на тесните улици и дополнително им го отежнува животот на оние кои се обидуваат да водат нормално секојдневие во Бибери.