Кошаркарот на Лос Анџелес Лејкерс признал дека во текот на минатата сезона поминал само неколку дена со своите деца и дека не знае како би издржал уште една година во такви околности.

„Сакаш да бидеш со своите деца секој ден, а јас моите ќерки ги видов, колку, четири или пет дена? Така е невозможно“, истакнал Дончиќ.

Семејните проблеми му ја одбележаа сезоната

Проблемите започнале во декември минатата година, кога Дончиќ отпатувал во Словенија поради раѓањето на помладата ќерка Оливија. За време на престојот дошло до несогласувања со неговата тогашна свршеница Анамарија Голтес околу можноста нивната постара ќерка Габриела да отпатува со него во Соединетите Американски Држави.

Според претходните медиумски извештаи, несогласувањата довеле до инцидент во породилиштето во Крањ, каде што интервенирала полицијата. Потоа, Дончиќ се вратил во САД, а своите ќерки не ги видел сè до април.

„Тоа ја направи минатата сезона толку тешка“, признал кошаркарот, кој и покрај приватните проблеми морал да продолжи со своите професионални обврски.

Кога новинарите го прашале дали верува дека ситуацијата наскоро ќе се реши, тој застанал за момент пред да одговори.

„Се надевам. Но, сè уште не знаеме. Затоа се надевам“, рекол тој.

Потоа изговорил реченица која најдобро опишува колку тешко му паѓа разделбата од неговите деца.

„Нема да издржам уште една сезона вака“, истакнал Дончиќ.

По раскинувањето на врската започна и правната битка

Дончиќ и Голтес се познавале уште од тинејџерските години, а се свршиле во 2023 година. Истата година ја добиле својата прва ќерка Габриела, додека Оливија се родила кон крајот на 2025 година.

Нивната долгогодишна врска во меѓувреме завршила, а поранешните партнери не успеале да постигнат договор за прашањата поврзани со децата.

Голтес претходно во Калифорнија започнала постапка поврзана со издршка за децата и адвокатски трошоци, но во август побарала повлекување на барањето.

На почетокот на октомври се појави вест дека Дончиќ започнал постапка во Словенија, повикувајќи се на Хашката конвенција, со цел да овозможи неговите ќерки да се вратат во Лос Анџелес.

Девојчињата моментално престојуваат со својата мајка во Словенија, додека Дончиќ поради обврските во НБА лигата живее во САД. Самото поведување на постапката не значи дека судот утврдил какво било противправно постапување од страна на еден од родителите.

„Ништо не ми е поважно од моите ќерки. Ќе направам сè што е во моја моќ за двајцата родители да бидат присутни во нивните животи“, изјавил неодамна Дончиќ за „The Athletic“ (Д Атлетик).

Кошаркарот го поминал летото во Словенија, каде што настојувал да помине што е можно повеќе време со своето семејство, но со почетокот на новата НБА сезона повторно морал да се врати во Лос Анџелес.