Но, одлуката на една баба, која стана вирална на ТикТок, покажува дека подарувањето може да изгледа и сосема поинаку. Додека многу баби и дедовци се обидуваат да ги израдуваат своите внуци со играчки и други подароци, таа одлучила да тргне по поинаков пат. Наместо да купува подароци, парите ги остава настрана и ги штеди за нивната иднина.

Со своето објаснување поттикнала многу родители да размислат за тоа што навистина им е потребно на децата.

Наместо подароци, пари за нивната иднина

„Уште еден Божиќ е пред самиот праг, а јас повторно нема да им купувам подароци на моите внуци. Сега сигурно мислите дека сум ужасна баба, нели?“, го започнала своето видео Тами Келтон, бабата на четири внуци.

Но, веднаш објаснила дека нејзината одлука има добра причина. Нејзините внуци имаат и други баби и дедовци, како и родители кои им купуваат подароци, па воопшто не им недостигаат. Затоа, уште пред десет години одлучила дека, наместо да им купува играчки и други работи, повеќе би сакала да им помогне да изградат посигурна финансиска иднина.

За оваа одлука однапред се договорила со својот син, па семејството уште од самиот почеток било запознаено со нејзиниот план. Така, никој не бил непријатно изненаден на божиќното утро.

Се разбира, тоа не значи дека се откажала од семејните прослави или заедничкото дружење. Едноставно, одлучила нејзиниот придонес во животот на внуците да биде поинаков.

„Посакувам некој да го направеше ова за мене“

Нејзината одлука предизвика бројни реакции, а многу родители во коментарите го поддржаа ваквиот начин на подарување.

„Ги молевме бабите и дедовците да го прават токму тоа, но тие секоја година инсистираа да купуваат работи што само ни создаваат неред“, напишала една корисничка.

Друга корисничка открила дека и нејзиното семејство избира поинакви подароци: „И ние не купуваме класични подароци, туку подаруваме доживувања. Годишни билети за аквариум, зоолошка градина, музеи и слично. Ми се допаѓа тоа што го правите“.

Особено внимание привлече и краткиот коментар на една корисничка: „Посакувам некој да го направеше ова за мене“.

Токму оваа мисла се провлекува низ многу од реакциите. Бројни возрасни се присетиле колку им било тешко кога почнале самостојно да живеат и се соочиле со трошоците за домување, образование и другите финансиски обврски. И додека играчките од детството одамна се заборавени, финансиската помош во тие моменти би им била и тоа како добредојдена.

Зошто нејзината одлука предизвика толку многу реакции?

Како што истакнува „Mother.ly“, приказната на оваа баба отвора прашање со кое се соочуваат многу современи родители – како да им овозможат на децата среќно детство, а истовремено да ги подготват за финансиските предизвици на возрасниот живот.

Високите цени на недвижностите, трошоците за образование и можноста за задолжување се само дел од причините поради кои родителите се грижат како нивните деца еден ден ќе се снајдат во животот.

Затоа, одлуката на оваа баба отвора интересно прашање: дали за децата е поважно да добијат што повеќе материјални работи додека се мали или да се обидеме да им обезбедиме полесен почеток на самостојниот живот?

Се разбира, едното не мора да го исклучува другото. Но, нејзината приказна потсетува дека многубројните подароци во детството не значат нужно и поголема финансиска сигурност на возрасни години.

Еден детаљ е особено важен

Во целата приказна постои уште еден важен детаљ – бабата не ја донела одлуката самостојно, без знаење на родителите. Најпрво разговарала со својот син и заедно се договориле на кој начин ќе им подаруваат на децата. Токму тој договор помогнал нејзината одлука да не биде сфатена како лишување од божиќни подароци, туку како промислен начин на грижа за иднината на своите внуци.

Сепак, ваквиот пристап не мора да одговара на секое семејство. Некои баби и дедовци немаат можност редовно да издвојуваат пари, некои деца немаат многу членови на семејството кои им купуваат подароци, а на некои родители особено им е важно да ја зачуваат традицијата на отворање подароци на божиќното утро.

Тоа не значи дека едниот начин на подарување е подобар од другиот. Приказната на оваа баба, пред сè, поттикнува на размислување за тоа што сакаме да им овозможиме на децата и каква вредност имаат нашите подароци.

Највредните подароци не мора да бидат под елката

Судејќи според коментарите, многу родители не сакаат децата нужно да добиваат помалку подароци, туку подароците да имаат поголема смисла. Наместо насобирање работи што децата брзо ќе ги надраснат или заборават, им се допаѓа идејата за подароци што ќе имаат долгорочна вредност.

За некои семејства тоа може да биде штедење, за други заеднички излети, патувања или доживувања што децата ќе ги паметат. Понекогаш највредното нешто што бабите и дедовците можат да им го подарат на своите внуци е токму времето што го поминуваат со нив.

Децата можеби нема да се сеќаваат на секој подарок што го пронашле под новогодишната елка. Но, кога ќе пораснат, би можеле многу да го ценат фактот дека некој со години однапред размислувал за нивната иднина.