Проектот кој на хартија изгледаше како сигурен кандидат за престижни награди и магнет за кинопубликата, се претвори во една од најголемите финансиски катастрофи на сезоната.
Долгоочекуваната сатира „Digger“ (Копач) на режисерот Алехандро Гонсалес Ињариту, со Том Круз во главната улога, доживеа вистинско фијаско на светските киноблагајни, отворајќи прашање кое Холивуд не очекуваше толку брзо да го постави – може ли Круз да ја привлече публиката и надвор од сигурната рамка на акционите блокбастери?
Филмот во својот премиерен викенд на глобално ниво заработил само 20 милиони долари, што е капка во море во споредба со огромниот продукциски буџет од 150 милиони долари и дополнителните 100 милиони долари потрошени за масовна маркетинг-кампања.
Филмските аналитичари проценуваат дека студиото со овој наслов би можело да забележи загуба од дури 150 милиони долари, пишува „Гардијан“.
Критичарски „масакр“ и збунета публика
Главната причина за вака слабиот одѕив се крие во исклучително лошите критики и студената реакција на гледачите. Ињариту, четирикратен добитник на Оскар, познат по пофалени остварувања како „Човекот Птица“ и „Повратникот“, овојпат понуди сложена и херметична сатира која ги подели и најстрогите филмски критичари.
Повеќето водечки медиуми го оценија филмот како претенциозен, нерамномерен и предолг, а публиката навикната на адреналинските акробации на Круз во серијалите „Невозможна мисија“ и „Топ Ган“ останала затекната од тонот и темпото на приказната. Лошите препораки од првите гледачи ја запечатиле судбината на филмот уште во текот на саботата и неделата.
Пресврт што не се исплатил
По години доминација на киноблагајните и статусот на „спасител на кината“, Круз свесно барал проект што би го вратил во трката за актерски Оскар, награда што упорно „бега од рацете“ во текот на целата кариера. Партнерството со мексиканскиот автор Ињариту изгледало како совршен стратешки потег за враќање кон авторскиот филм и сериозните драмски улоги, во стилот на „Магнолија“ или „Џери Мегвајер“.
Но, наместо триумфален залет кон Оскарите, првите резултати ја покажаа суровата реалност: публиката Круз пред сè го доживува како акциски херој, а сатирата на Ињариту се покажа како преголем и премногу ризичен експеримент за толку скап студиски проект.
