Американскиот претседател Доналд Трамп и лидерите на големите технолошки компании потпишаа доброволен договор во Белата куќа во врска со развојот на вештачката интелигенција – договор што Трамп го опиша како еден вид „устав“ за вештачката интелигенција.

Документот не претставува ниту закон, ниту правно обврзувачка регулатива. Трамп го опиша како „морално обврзувачки“, а според моментално достапните детали, компаниите се обврзале на различни нивоа на верификација и надзор на нивните системи за вештачка интелигенција.

„На некој начин, тоа е како устав; потпишано е од најважните луѓе во светот – и јас го потпишав, како претседател – и навистина служи како форма на заштита“, изјави Трамп по средбата.

Трамп размислува за комисија од десет члена

Трамп изјави дека неговата администрација исто така размислува за формирање посебно тело кое би го следело развојот на вештачката интелигенција.

„Размислуваме за формирање комисија со можеби десет члена… за таа комисија да го надгледува целиот процес“, рече тој.

Според АП, договорот опфаќа внатрешни контроли во компаниите, надворешни ревизии и надзор на ниво на извршниот менаџмент. Сепак, засега, Трамп продолжува да се залага за модел во кој индустријата во голема мера сама се регулира, наместо да се воведуваат опсежни нови федерални регулативи.

На масата: Цукерберг, Маск, Пичаи, Хуанг, Амодеи…

На состанокот во Белата куќа присуствуваа некои од највлијателните личности во технолошката индустрија, меѓу кои Марк Цукерберг (Meta), Илон Маск (xAI), Сундар Пичаи (Google), Џенсен Хуанг (Nvidia), Дарио Амодеи (Anthropic), Грег Брокман (OpenAI) и Алекс Карп (Palantir). Учествуваше и основачот на Amazon, Џеф Безос.

Состанокот се одржува во време кога се сè погласни предупредувањата од самата индустрија за вештачка интелигенција во врска со потенцијалните ризици што ги носат системите со сè поголеми способности. Некои лидери на компании повикуваат на построги безбедносни проверки и побавен развој на најнапредните модели, додека Трамп предупредува дека прекумерната регулација би можела да ги забави САД во технолошката трка со Кина.

Минатата недела, на Генералното собрание на ОН, Трамп изјави дека ги отфрла обидите за создавање глобален систем за контрола на вештачката интелигенција.

Неговата администрација оваа година исто така претстави национална рамка за вештачка интелигенција која става акцент на американската технолошка конкурентност, индустрискиот развој и безбедноста, но во неа недостасува широкиот регулаторен модел каков што, на пример, усвои Европската Унија.

По денешната средба, Трамп повторно ја истакна конкуренцијата со Кина.

„Ние сме пред Кина и пред сите други, и сакам така и да остане“, рече тој.

Тој исто така изјави дека не сака заеднички да утврдува правила за развој на вештачката интелигенција со кинескиот претседател Ши Џинпинг, бидејќи смета дека тоа би им ја отежнало работата на американските компании во одржувањето на технолошката предност пред нивните кинески конкуренти.