Сè наводно започнало во септември 2025 година, кога неименуваниот Србин кој живее во Салцбург, на засега непознат начин дошол до картичката за гориво на споменатата компанија и ја оштетил за околу 68.000 евра, пренесуваат австриските медиуми.

Дизел по едно евро за литар

Според полицискиот извештај, 29-годишникот станал невнимателен и своите „услуги“ им ги понудил на поширок круг луѓе, со што го привлекол вниманието на полицијата, пренесе „блиц.рс“.

Заинтересираните му се јавувале и се среќавале со него на одредена бензинска пумпа во Салцбург, која ја прифаќала картичката за плаќање гориво на оштетената компанија.

Таму осомничениот наводно им точел гориво во возилата на муштериите, а некои, според достапните информации, доаѓале и со канистри. Дизелот, на воодушевување на муштериите, го продавал за само едно евро за литар.

Продал 54.000 литри дизел

Според обвинението на обвинителството во Салцбург, 29-годишникот ја искористил картичката за гориво вкупно 136 пати до јануари оваа година.

Станува збор за огромна количина: на овој начин биле наточени вкупно 54.000 литри дизел. Обвинителството ја проценува причинетата штета на околу 68.000 евра.

Досега неосудуваниот 29-годишник ќе мора да одговара пред Окружниот суд во Салцбург, а се товари за измама при обработка на податоци и фалсификување документи, се наведува во соопштението на надлежните институции во Салцбург.