Романскиот производител „Dacia“ подготвува сериско производство на новиот градски електричен модел „Hipster“, чија почетна цена ќе изнесува околу 11.000 евра. Овој потег претставува директен одговор на новите иницијативи од Брисел за воведување посебна категорија мали и достапни возила. Се очекува евтиниот електричен автомобил наскоро да се појави во продажните салони ширум Европа.
Моделот „Hipster“ е создаден со цел да го редефинира поимот „народен автомобил“ во ера кога цените на електричните автомобили ненормално растат. Наместо трка за поголеми и поскапи батерии, инженерите направиле возило првенствено наменето за секојдневно градско возење.
Автомобилот влегува во категоријата лесни четирицикли, што му овозможува поедноставна регистрација и пониски трошоци за производство. Неговата тежина без батеријата изнесува само 450 килограми, додека максималната брзина е ограничена на 90 километри на час.
По промените во самиот врв на компанијата, новото раководство побарало дополнително намалување на трошоците и изработка на подостапна верзија. Поради тоа, во развојот активно се вклучил кинески инженерски тим кој бара начини да заштеди на материјалите без губење на функционалноста.
Производството на новиот модел ќе се одвива во Кина, каде што се склопуваше и првата генерација на моделот „Spring“. Оттаму возилото ќе им се испорачува на купувачите во Европа по однапред утврдената поволна цена.
Главниот предизвик во текот на развојот претставува батеријата со капацитет од 15 kWh. Таа мора да обезбеди доволен досег за секојдневните градски обврски, а истовремено да не ја зголеми цената на целиот автомобил.
Објавените патентни цртежи откриваат дека сериската верзија ќе го задржи препознатливиот изглед на концептот, со благо изменети браници и светла. Предните прозорци ќе бидат поделени на два дела и ќе се отвораат нагоре за заштеда на простор и полесно користење.
На задниот дел од возилото се наоѓа практичен детаљ во форма на врата која се отвора странично. Димензиите од три метри должина и метар и половина ширина ќе овозможат исклучително лесно паркирање и во најголемите градски турканици.
Конечниот изглед на автомобилот официјално ќе биде претставен следната година, откако проектот ќе го добие последното одобрение од раководството. Доколку сè се одвива според планот, купувачите ќе го добијат најдостапното електрично возило на пазарот.
