Зидан, искусен туристички водич, роден и израснат во тој крај, за време на едно од неодамнешните патувања низ оддалечениот регион Вади Џадид забележал необичен артефакт меѓу метални кутии, високо на карпест гребен.

„Помислив дека е шега“

Во шишето, делумно исполнето со песок, се наоѓала рачно напишана порака: „Мај 1977; Том Моран; Група 6305; Авич, улица Беј; Малта“.

Братучедот и деловен партнер на Зидан, Ајман, испратил фотографија од пораката до весникот „Times of Malta“, со молба да пронајдат какви било информации за авторот.

Навидум едноставната трага – име, назив на куќа и улица – не содржела податок за местото во кое се наоѓа објектот. Сепак, потрагата набрзо почнала да дава резултати.

Копија од изданието на државниот гласник од 22 јануари 1981 година содржела податок за лице со презиме Моран кое живеело на адресата Авич, улица Беј, во приморскиот град Марсаскала, во јужниот регион на Малта.

Пораката објавена во една од заедниците на „Facebook“, каде што се огласуваат жителите на градот, ги довела новинарите до Кармен Роситер – сестрата на Моран!

„Помислив дека станува збор за шега кога ми се јавивте, но веднаш го препознав ракописот на мојот брат“, изјавила Роситер за „Times of Malta“.

„Го напушти училиштето на 16 години“

Том Моран, сепак, не дочекал да дознае дека неговата порака е пронајдена. Починал во 1998 година, на 54-годишна возраст.

Тој бил едно од седумте деца на брачна двојка која за време на Втората светска војна, како бегалци, се преселила од Бормла во Биркиркара.

Куќата во Марсаскала ја купил кон крајот на шеесеттите години, пред подоцна да ја продаде и да се пресели во Забар. Неколку години работел во Египет како геофизичар за една американска компанија која се занимавала со истражување на нафтени наоѓалишта.

„Го напушти училиштето на 16 години и ѝ се приклучи на британската војска, каде што изучи занает. Тоа го однесе низ целиот свет, од Саудиска Арабија до Папуа Нова Гвинеја“, раскажала Кармен Роситер.

Во последните години од животот, Моран работел во државниот Оддел за истражување на нафта.

„Секогаш велеше дека Малта треба да бара нафта на југоисток“, додала таа.

Неговата сестра го опишува како сериозен и прецизен човек во работата, но и како личност склона кон шеги. Бил оженет, но немал деца.

„Талкавме низ пустелијата“

Кога станува збор за Сулејман Зидан и неговиот братучед Ајман, пронаоѓањето на пораката во шише било необично од две причини – поради поврзаноста со Малта, но и поради местото каде што „преживеала“ речиси половина век.

„Сулејман прв ја забележа таа локација за време на едно од патувањата длабоко низ пустината“, изјавил Ајман.

Искусниот водич забележал неколку необични предмети на карпестото возвишение и одлучил да застане и да ги истражи. Меѓу нив имало шише со порака, стар челичен резервоар за вода и исушени палмови гранки.

„Речиси пет децении подоцна, пустината ја сочувала пораката недопрена“, додал тој.

Сулејман и Ајман се припадници на племето Рашаида и најголемиот дел од животот го поминале патувајќи низ Западната Пустина. Сега се во почетна фаза на основање компанија за експедиции која ќе го носи името „Ryum“.

Нивната идеја е да ги следат старите патишта на караваните со камили и патеките по кои луѓето некогаш ја преминувале пустината, многу пред во тој дел од Египет да пристигнат асфалтираните патишта.

„Талкавме длабоко низ пустелијата за да ги пронајдеме, повторно да ги откриеме и да ги исцртаме тие заборавени историски патеки“, изјавил Ајман.

За време на едно од таквите истражувања, Сулејман наишол на местото на кое со децении стоела пораката на непознат човек.