Според извештајот на „ТМЗ“, пејачката и нејзиниот партнер Мајкл Полански за доаѓањето на свет на нивното бебе ја искористиле помошта на сурогат-мајка.

Како што наведува овој портал, ќерката на Гага, која го добила старинското име Роуз Бин Полански е родена на 9 јуни 2026 година во Лос Анџелес. Пејачката, која оваа година наполни 40 години, претходно јавно не откри дека очекува дете.

Гага и претходно зборувала за желбата да стане мајка

Веста особено ја изненади јавноста бидејќи Гага не се појавувала во јавност со труднички стомак. Напротив, пејачката и непосредно пред раѓањето на нејзината ќерка остварила неколку големи јавни појавувања.

На црвениот килим се појавила на 15 мај по повод премиерата на филмот „MAYHEM Requiem“, додека претходно, на 20 април, присуствувала и на светската премиера на филмот „Ѓаволот носи Прада 2“, во кој има камео-улога.

Сепак, Гага уште претходно навестила дека сериозно размислува за мајчинството. Во интервју емитувано во октомври 2025 година, во емисијата „The Late Show with Stephen Colbert“, таа зборувала токму за таа желба.

„Би сакала да направам уште многу работи. Сите тие можности се отворени. Но, она што навистина го сакам е да станам мајка. Се надевам дека тоа ќе биде мојата следна главна улога“ изјавила тогаш Гага.

Лејди Гага имала сериозни здравствени проблеми

Една од причините поради кои вниманието го привлече информацијата за начинот на кој Гага добила дете е и фактот што пејачката претходно отворено зборувала за својата здравствена состојба и проблемите со хронична болка.

Во својот документарен филм „Five Foot Two“ од 2017 година, таа зборувала за тоа како фибромијалгијата ѝ го променила секојдневниот живот.

Според објаснувањето на угледната американска клиника „Мајо“, фибромијалгијата е хронична состојба која се карактеризира со широко распространета болка низ телото, често придружена со замор, а може да се појават и проблеми со спиењето, помнењето и расположението.

Се смета дека оваа состојба е поврзана со начинот на кој мозокот и ’рбетниот мозок ги обработуваат болните и безболните сигнали, поради што лицето може да има зголемена чувствителност на болка.

Во 2020 година, за време на разговорот со Опра Винфри, Гага изјавила дека чувствува болка „од глава до пети“. Неколку години подоцна, таа рекла нејзината состојба е под контрола, иако и понатаму имало денови кога чувствувала болка.