Трансплантиран свински бубрег функционирал во телото на маж од Соединетите Американски Држави 271 ден, со што е соборен рекорд, а во меѓувреме била пронајдена личност која му донирала орган.
Американските лекари тврдат дека никогаш досега не се случило животински орган да функционира толку долго во човечко тело и додаваат дека свинските органи можат да се користат како „мост“ додека не се појави соодветен човечки орган за трансплантација.
Операцијата му дала надеж
Пациентот Тим Ендруз изјавил дека оваа операција му дала надеж и му овозможила повеќе да не мора секојдневно да оди на дијализа, пренесе „Би-би-си“.
Свинскиот орган на крајот престанал да функционира и бил отстранет, поради што на Ендруз му биле потребни неколку дијализи пред да му биде пронајден човечки донатор.
Во последните години лекарите интензивно ја истражуваат ксенотрансплантацијата – употребата на органи од други видови, поради хроничниот недостиг на органи за трансплантација.
100.000 луѓе чекаат за бубрег
Во САД околу 100.000 луѓе чекаат за трансплантација на бубрег, додека годишно се вршат околу 25.000 трансплантации.
Свињите се сметаат за идеални животни за ксенотрансплантација. Нивните органи се со приближно соодветна големина, а постои и долгогодишно искуство во нивното одгледување.
Истражувачите развиле таканаречени јукатански џуџести свињи, кои биле подложени на 69 генетски модификации за нивните органи да можат да се користат за овие цели.
Фото: Би-би-си
